Վախճանվել է բանաստեղծուհի, հրապարակագիր Սեդա Վերմիշեվան
ԵՐԵՎԱՆ, 19 ՓԵՏՐՎԱՐԻ, ԱՐՄԵՆՊՐԵՍ: Կյանքի 88-րդ տարում վախճանվել է բանաստեղծուհի, հրապարակագիր, ՀԳՄ անդամ Սեդա Վերմիշեվան: «Արմենպրես»-ին այս մասին հայտնեցին Հայաստանի գրողների միությունից:
Ավարտել է ԵՊՀ տնտեսագիտության ֆակուլտետը, այնուհետև՝ ասպիրանտուրան։ Շուրջ 25 տարի որպես ավագ գիտաշխատող աշխատել է ՀՍՍՀ տնտեսագիտության և պլանավորման ինստիտուտում։
ՀԳՄ ռուսագիրների բաժանմունքի համանախագահն էր, միաժամանակ Մոսկվայի ԳՄ, Ռուսահայերի միության վարչության և ՌԴ կառավարությանն առընթեր ռուս-հայկական բարեկամության նախագահության անդամ։
Հեղինակ է շուրջ երեք տասնյակ գիտական, հրապարագրական, բանաստեղծական հայերեն և ռուսերեն գրքերի ու ժողովածուների։
Ազգային-հասարակական, գրական-հրապարակագրական ակտիվ գործունեու-թյան համար արժանացել է «Մովսես Խորենացի», «Ներսես Շնորհալի», «Մ. Լերմոնտով» և Հայաստանի Հանրապետության, Ռուսաստանի Դաշնության, Արցախի Հանրապետության, Ռուսահայերի միության և այլ կազմակերպությունների մի շարք այլ բարձր պարգևների։
Ազգային-հասարակական, գրական-գիտական վաստակավոր գործչի՝ Սեդա Վերմիշեվայի հիշատակը վառ կմնա նրա համախոհների, գրչընկերների և ընթերցողների հիշողության մեջ։
Հոգեհանգիստը տեղի կունենա փետրվարի 21-ին, ժամը 17.00-20.00 Միքայելյան հիվանդանոցի հարևանությամբ գտնվող սգո սրահում, վերջին հրաժեշտը՝ Հայաստանի Գրողների Միությունից փետրվարի 22-ին, ժամը 12.00 - 14.00:
Բաժանորդագրվեք մեր ալիքին Telegram-ում