ԵՐԵՎԱՆ, 19 ՓԵՏՐՎԱՐԻ, ԱՐՄԵՆՊՐԵՍ: Հայաստանի Հանրապետության Ազգային ժողովի փոխնախագահ Ալեն Սիմոնյանը և ԱԺ «Իմ քայլը» խմբակցության պատգամավոր, արտաքին հարաբերությունների մշտական հանձնաժողովի նախագահ Ռուբեն Ռուբինյանն արձագանքել են  ՍԴ աշխատակազմի ղեկավար Էդգար Ղազարյանի գրառմանը սահմանադրական փոփոխությունների հանրաքվեն բոյկոտելու վերաբերյալ:

«Սահմանադրական դատարանի՝ այսինքն ապաքաղաքական մարմնի աշխատակազմի ղեկավարը հանրաքվեն համարում է հակասահմանադրական և այն բոյկոտելու կոչ է անում։

Շնորհակալ եմ ՍԴ աշխատակազմի ղեկավարին ՍԴ շուրջ առկա խնդիրն էլ ավելի ակներև դարձնելու ու մեր քաղաքացիներին հանրաքվեին ԱՅՈ ասելու ևս մեկ պատճառ տալու համար»,- «Արմենպրես»-ի փոխանցմամբ՝ «Ֆեյսբուք»-ի իր էջում գրել է Ռուբեն Ռուբինյանը։

«Հիմա էլ ՍԴ-ի աշխատակազմի ղեկավարն է մտել քաղաքականություն և կոչ է անում ապրիլի 5-ին բոյկոտել հանրաքվեն: Այս դատարանի` ծայրից ծայր քաղաքականացված լինելը արդեն թաքցնելու փորձ էլ չի արվում»,- արձագանքելով Էդգար Ղազարյանի գրառմանը՝ «Ֆեյսբուք»-ի իր էջում գրել է Ալեն Սիմոնյանը:

Սահմանադրական դատարանի աշխատակազմի ղեկավար Էդգար Ղազարյանը «Ֆեյսբուք»-ի իր էջում գրառում է կատարել, որով կոչ է արել բոյկոտել ապրիլի 5-ին կայանալիք սահմանադրական փոփոխությունների հանրաքվեն: Ղազարյանը գրել է, որ կյանքում առաջին անգամ չի մասնակցելու հանրաքվեի՝ իր ընկերներին, մտերիմներին և հարազատներին կոչ անելով լուրջ չվերաբերվել հանրաքվեին: «Ես կոչ եմ անում իմ բոլոր ընկերներին, բարեկամներին և մտերիմներին, լուրջ չվերաբերվել այդ ամենին, անտեսել այդ կեղծ օրակարգը, զբաղվել սեփական գործերով և որևէ կերպ մասնակցություն չունենալ այդ խարդավանքին»,- գրել է Ղազարյանը՝ հայտարարելով, որ պատրաստվում է այդ օրը տոնել Ծաղկազարդը։