ԵՐԵՎԱՆ, 29 ՀՈՒՆՎԱՐԻ, ԱՐՄԵՆՊՐԵՍ: ՀՀ Ազգային ժողովի «Բարգավաճ Հայաստան» խմբակցության անդամ Իվետա Տոնոյանը տարօրինակ է համարում «Վետօ» նախաձեռնության ղեկավար Նարեկ Մալյանին, «Ադեկվադ» միաբանության անդամներ Կոնստանտին Տեր-Նակալյանին և Արթուր Դանիելյանին ու «Քաղաքացիական գիտակցություն» ՀԿ նախագահ Նարեկ Սամսոնյանին բերման ենթարկելու գործողությունները:

«Արմենպրես»-ի փոխանցմամբ՝ այս մասին Տոնոյանն ասաց հունվարի 29-ին խորհրդարանում տեղի ունեցած ճեպազրույցների ընթացքում:

«Ինձ համար տարօրինակ էր: Պետք է բոլոր գործողություններն իրականացվեն իրավական հարթությունում՝ անկախ նրանից, թե ում նկատմամբ են դրանք իրականացվում»,- ասաց Տոնոյանը:

Խմբակցության անդամ Արման Աբովյանը նշեց, որ յուրաքանչյուր գործողություն, որ կատարվում է ՀՀ քաղաքացու նկատմամբ, պետք է հիմնավորված լինի:

Հունվարի 28-ին «Վետօ» նախաձեռնության ղեկավար Նարեկ Մալյանը, «Ադեկվադ» միաբանության անդամներ Կոնստանտին Տեր-Նակալյանը և Արթուր Դանիելյանը ու «Քաղաքացիական գիտակցություն» ՀԿ նախագահ Նարեկ Սամսոնյանը ոստիկանություն էին բերման ենթարկվել ապօրինի զենք, զինամթերք պահելու և թմրամիջոցներ ձեռք բերելու, պահելու կամ օգտագործելու կասկածանքներով: