Զինված ուժերի կազմավորման 28-րդ տարեդարձը նշվեց նաև Գյումրիում
ԳՅՈՒՄՐԻ, 28 ՀՈՒՆՎԱՐԻ, ԱՐՄԵՆՊՐԵՍ: Հայաստանի Հանրապետության զինված ուժերի կազմավորման 28-րդ տարեդարձը նշվեց նաև Գյումրիում: Բանակի տոնի առթիվ Գյումրու կայազորում կայացավ հանդիսավոր միտինգ:
Տոնի առթիվ զինվորներին և սպաներին ողջունեց ՀՀ ԶՈՒ հրթիռային զորքերի և հրետանու վարչության պետի տեղակալ, գնդապետ Ռուբեն Գասպարյանը: «Այսօր պատմական օր է մեզ համար, քանզի 28 տարի առաջ ստեղծվեցին հայկական զինված ուժերը: 28 տարի առաջ, երբ առաջին անգամ հայերեն հնչեց «Զգա՛ստ» հրամանը, պարզ դարձավ, որ պատմության մի նոր էջ է բացվում՝ իրականանում է հայ ժողովրդի դարավոր իղձը՝ սեփական բանակ ունենալու իրողությունը: Մեր բանակը ստեղծվել է շատ դժվարին պայմաններում՝ Խորհրդային միության կազմալուծումը, Արցախյան պատերազմը, անկախության ձգտումը, ավերիչ երկրաշարժը. մի կողմից՝ վերականգնելով տնտեսությունը, մյուս կողմից՝ ամեն ինչ անելով, որ անառիկ պահի սահմանները: Փա՛ռք Աստծո, հայոց բանակը հզորացավ և իր առաջին քայլերը պսակեց երևելի հաղթանակներով: Անցած 28 տարիները եղել են մաքառումներով տարիներ: Այսօրվա հարաբերական անդորրը մեզ պարտադրում է ունենալ մարտունակ բանակ»,-ՀՀ զինված ուժերին բարձր մարտունակություն մաղթելով և շնորհավորելով բոլորին՝ նշեց գնդապետ Ռուբեն Գասպարյանը:
Տոնի առթիվ ներկաներին շնորհավորեցին նաև Շիրակի մարզպետն ու Գյումրու քաղաքապետը:
Հանդիսավոր պայմաններում, ի նշանավորումն Հայոց բանակի 28-րդ տարեդարձի, պատվոգրեր և շնորհակալագրեր հանձնվեցին իրենց ծառայությամբ աչքի ընկած սպաներին և զինվորներին: Միջոցառումը եզրափակվեց շարային հանդիսավոր քայլերթով:
Տոնի կապակցությամբ համերգային ծրագրով հանդես եկավ Գյումրու Ժողովրդական գործիքների պետական նվագախումբը: Կայազորին շնորհավորելու էին եկել նաև Գյումրու թիվ 11 դպրոցի աշակերտները:
Օրվա ընթացքում, մարզային ու քաղաքային իշխանությունների ներկայացուցիչները, երկրապահ կամավորները, այցելեցին «Շիրակ» գերեզմանատան ազատամարտիկների պանթեոն, մասնակցեցին Արցախյան հերոսամարտում ու ապրիլյան քառօրյա պատերազմում զոհված ազատամարտիկների ու զինծառայողների շիրիմներին պսակադրման և ծաղկեդրման արարողության:
Արմենուհի Մխոյան
Բաժանորդագրվեք մեր ալիքին Telegram-ում