ԵՐԵՎԱՆ, 22 ՀՈՒՆՎԱՐԻ, ԱՐՄԵՆՊՐԵՍ: ՀՀ արտակարգ իրավիճակների նախարարությունում հունվարի 22-ին կայացավ ՓԾ ծառայության կազմակերպման վարչության 2019 թվականի գործունեության արդյունքների ամփոփմանը նվիրված խորհրդակցություն, որը վարեց փրկարար ծառայության տնօրենի տեղակալ, փ/ծ գնդապետ Արմեն Գրիգորյանը: «Արմենպրես»-ին այս մասին հայտնեցին ՀՀ ԱԻՆ տեղեկատվության և հասարակայնության հետ կապերի վարչությունից:

Փրկարար ծառայության տնօրենի տեղակալ Ա. Գրիգորյանը շնորհակալություն հայտնեց ծառայության կազմակերպման վարչության ողջ անձնակազմին կատարված աշխատանքների համար: Փրկարար ծառայության տնօրենի տեղակալը նշեց, որ առաջնահերթություններից են կարգապահությունն և համազգեստի կրման կանոնների պահպանումը:

Ծառայության կազմակերպման վարչության պետ, փ/ծ գնդապետ Տիգրան Ավագյանը հանդես եկավ զեկույցով` ամփոփելով վարչության 2019 թվականի գործունեության արդյունքները:

Ծառայության կազմակերպման վարչության կողմից հաշվետու ժամանակահատվածում իրականացվել են աշխատանքներ հետևյալ ուղղություններով՝

1.Փրկարարական ծառայության կազմակերպմանն ուղղված պլանների, ծրագրերի, իրավական ակտերի և այլ փաստաթղթերի մշակում

2. Ծառայության ընթացքում տեղ գտած թերությունների բացահայտում, աշխատակիցների կողմից թույլ տրված կարգապահական խախտումների դեպքերի վերաբերյալ ծառայողական քննությունների իրականացում
3. Էլեկտրոնային միասնական կառավարման համակարգի ներդրում

4.Կենտրոնացված ազդարարման համակարգի ստեղծում, արդիականացում և դրա աշխատունակության ապահովում

5. ԱԻՆ վարչական տարածքում պարեկային պահակային ծառայության իրականացում

6.Արտակարգ իրավիճակներում բնակչության պաշտպանություն և քաղաքացիական պաշտպանության միջոցառումների կառավարման գործընթացների հուսալի կապով ապահովում

7.Ժամանակակից ռադիոկապի համակարգի հիմնում, զարգացում և դրա աշխատունակության ապահովում

8. Կապի, ինքնավար կառավարման համակարգերի կազմակերպում, զարգացում և դրա աշխատունակության ապահովում և այլն:

Ամփոփելով զեկույցը` Տ. Ավագյանը անդրադարձավ վարչության գործունեության ընթացքում առաջացած խնդիրներին և ներկայացրեց մի շարք առաջարկություններ:

Տ. Ավագյանը շնորհակալություն հայտնեց անձնակազմին և հույս հայտնեց, որ կառուցվածքային փոփոխությունների արդյունքում ծառայության կազմակերպման և օպերատիվ կառավարման վարչությանների միավորման հետևանքով ձևավորված նոր վարչության աշխատանքներն էլ ավելի արդյունավետ կլինեն: