ԵՐԵՎԱՆ, 17 ՀՈՒՆՎԱՐԻ, ԱՐՄԵՆՊՐԵՍ: ՀՀ Ազգային ժողովի «Իմ քայլը» խմբակցությունը ՀՀ վարչապետ Նիկոլ Փաշինյանի հետ հանդիպման ընթացքում անդրադարձել է արտաքին և ներքին քաղաքականությանը վերաբերող մի շարք թեմաների և խմբակցության հետագա գործունեությանը:

«Արմենպրես»-ի փոխանցմամբ` այս մասին հունվարի 17-ին լրագրողների հետ զրույցում ասաց խմբակցության ղեկավար Լիլիթ Մակունցը:

«Խմբակցությունը յուրաքանչյուր ամիս հանդիպում է ունենում վարչապետի հետ: Մեզ համար աշխատանքային օրակարգի մաս են կազմում այդ հանդիպումները: Հանդիպումը հիմնականում առաջիկա տարվա ընթացքում աշխատանքների համակարգման վերաբերյալ էր: Անդրադարձել ենք ամենատարբեր հարցերի. տարածաշրջանում հարևանների հետ հարաբերություններին, ներքաղաքական հարցերին, առանձին ուղղություններով կոնկրետ ոլորտների զարգացմանը և մեր հետագա քայլերին»,- ասաց Մակունցը:

Հունվարի 17-ին ԱԺ «Իմ քայլը» խմբակցության հանդիպումը ՀՀ վարչապետ Նիկոլ Փաշինյանի հետ տեղի է ունեցել «Քաղաքացիական պայմանագիր» կուսակցության կենտրոնական գրասենյակում: