Էրիկ Գրիգորյանը բավարարված չէ «Սևան» ազգային պարկի վերահսկողությունից
ԵՐԵՎԱՆ, 25 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ շրջակա միջավայրի նախարար Էրիկ Գրիգորյանը սուբյեկտիվ և օբյեկտիվ պատճառներով բավարարված չէ սիգի վաճառքի հետ կապված «Սևան» ազգային պարկի վերահսկողությունից:
«Արմենպրես»-ի հաղորդմամբ՝ Գրիգորյանն այս մասին ասաց տարեվերջյան ասուլիսի ժամանակ:
«Կարծում եմ, որ «Սևան» ազգային պարկի աշխատակիցները պետք է մի քանի անգամ ավելի ջանասիրաբար աշխատեն: Մոտ երկու օր առաջ նշանակվել է ազգային պարկի նոր տնօրեն, 10 աշխատակցի նկատմամբ հարուցվել է քրեական գործ»,- նշեց Գրիգորյանը:
Նախարարը կոչ արեց քաղաքացիներին, որպեսզի առնվազն ձվադրող ձկների գնում չիրականացնեն։
«Այսօրվանից հնգակողմ հրաման է տրվել, որպեսզի սիգի որսն ավելի խստացվի՝ ՀՀ ոստիկանության, Բնապահպանության և բնօգտագործման տեսչության, ՀՀ շրջակա միջավայրի նախարարության, Գեղարքունիքի մարզպետարանի և այս տարվանից՝ ՊԵԿ-ի կողմից: Մենք ամեն ինչ պետք է անենք, որպեսզի էլ չտեսնենք փողոցներում վաճառվող սիգ»,- շեշտեց Գրիգորյանը։
Բաժանորդագրվեք մեր ալիքին Telegram-ում