Ռուսաստանը շարունակում է գլխավորել Հայաստանի հիմնական առևտրային գործընկերների ցանկը
ԵՐԵՎԱՆ, 12 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանի հիմնական առևտրային գործընկերների ցանկը 2019 թվականին շարունակում է գլխավորել Ռուսաստանը: «Արմենպրես»-ի հաղորդմամբ, լրագրողների հետ հանդիպմանը Հայաստանում ՌԴ առևտրային ներկայացուցիչ Անդրեյ Բաբկոն նշեց, որ ընդհանուր առևտրաշրջանառության ծավալում հունվար-սեպտեմբերին Ռուսաստանին բաժին է ընկնում 27 տոկոսը: Երկրորդ տեղում Չինաստանն է, որին հաջորդում է Շվեյցարիան, այնուհետև՝ Գերմանիան և Իրանը:
«Ռուսաստանի հետ առևտրաշրջանառության կառուցվածքում հիմնականում փոփոխություններ չկան՝ գյուղմթերք, վերամշակված մթերք, գազ, գյուղտեխնիկա և այլն: Ուզում եմ ընդգծել, որ գնային և որակական առումով հայկական ապրանքները մրցունակ են մեր շուկայում»,-ասաց Անդրեյ Բաբկոն:
Ինչ վերաբերում է ներդրումներին, Անդրեյ Բաբկոն նշեց, որ այստեղ նույնպես ռուսական ընկերություններն առաջնային տեղերում են: 2019 թվականի հունվար-սեպտեմբերին ընդհանուր ներդրումների ծավալում 43.6 տոկոսը Ռուսաստանի ներդրումներն են:
Անդրեյ Բաբկոն ընդգծեց, որ ռուսական ընկերությունները պատրաստակամ են ակտիվ ներդրում ունենալ գյուղատնտեսական, աղբահավաք, ճանապարհային տեխնիկայի մատակարարման գործում: Նա տեղեկացրեց, որ Տարածքային կառավարման և ենթակառուցվածքների նախարարության, ինչպես նաև Երևանի քաղաքապետարանի հետ ակտիվ քննարկումների մեջ են:
«Մեր ընկերությունները պատրաստ են իրենց ներդրումն ունենալ տրանսպորտային ցանցի արդիականացման ծրագրի շրջանակում: Կարող եմ ասել, որ մեր ներկրված տեխնիկան կարող է լինել մրցունակ: Չէ որ որպես ԵԱՏՄ անդամ երկիր մաքսային վճարներ չկան: Դրանից բացի, տեղափոխման ճանապարհային ծախսը մոտ 80 տոկոսը սուբսիդավորվում է: Ստացվում է՝ այն գնով, որ ապրանքը գործարանից դուրս եկավ չնչին տարբերությամբ կհասնի Հայաստան»,-ասաց Անդրեյ Բաբկոն: Առաջարկներ կան ինչպես ավտոբուսների, այնպես էլ տրոլեյբուսների հետ կապված: Երևանի երկու փոխքաղաքապետերի հետ ակտիվ աշխատանք է տարվում: Անդրեյ Բաբկոն նշեց, որ իրենք հետաքրքրված են նաև վերելակների թարմացման ծրագրով:
«Վերելակների հետ կապված, հայտնի է, որ այն մեծ ծախս ու ներդրումներ է պահանջում: Հասկանալի է, որ բնակիչների կողմից ներկայում վերելակների համար վճարվող գումարը փոքր է, հետևաբար պետական սուբսիդավորում է անհրաժեշտ: Երբ այդ և ֆինանսական հարցերը հստակեցվեն, պայմանավորվածությունը ձեռք բերվի,մենք պատրաստ ենք այս գործում ևս մեր ներդրումն ունենալ»,-ասաց Անդրեյ Բաբկոն: