1000х90.jpg (78 KB)

ՀՀ ԱԳ նախարարը Պոլ Ռիչարդ Գալագերի հետ քննարկել է Հայաստանի ու Սուրբ Աթոռի հարաբերությունները

Armenpress 14:45, 9 Նոյեմբեր, 2019

ԵՐԵՎԱՆ, 9 ՆՈՅԵՄԲԵՐԻ, ԱՐՄԵՆՊՐԵՍ: Հայաստանը հանձնառու է շարունակելու և առավել խորացնելու  Սուրբ Աթոռի հետ սերտ համագործակցությունը ու գործընկերությունը:  Ինչպես տեղեկացնում է «Արմենպրես»-ը, նոյեմբերի 9-ին Սուրբ Աթոռի պետությունների հետ հարաբերությունների քարտուղար, արքեպիսկոպոս Պոլ Ռիչարդ Գալագերի հետ համատեղ ասուլիսի ժամանակ այս մասին ասաց ՀՀ արտաքին հարաբերությունների նախարար Զոհրաբ Մնացականյանը:

ՀՀ ԱԳ նախարարի խոսքով` Գալագերի այցը ևս մեկ կարևոր քայլ է Հայաստանի և Սուրբ Աթոռի միջև զարգացում ապրող երկկողմ հարաբերություններում:

«Ուրախ եմ, որ մենք պահպանում ենք երկկողմ բարձրաստիճան այցերի դինամիկան: Գալագերն իր մեծ ավանդը ունի ինչպես հայ-վատիկանյան միջպետական հարաբերությունների խորացման գործում, այնպես էլ առհասարակ միջազգային հարաբերություններում: Պետք է նշել, որ Հայաստանի և Սուրբ Աթոռի միջև երկկողմ հարաբերությունների բարձր մակարդակը նաև Նորին Սրբության անձնական բարձր շահագրգռվածության արդյունք է, որի համար Հայաստանը երախտապարտ է»,- ընդգծեց Մնացականյանը:

ՀՀ ԱԳ նախարարը ևս մեկ անգամ հաստատեց Հայաստանի շահագրգռվածությունը խորացնելու հարաբերությունը Սուրբ Աթոռի հետ, որոնք հիմնված են ընդհանուր արժեհամակարգի ու միջազգային հարաբերությունների խնդիրների վերաբերյալ համընկնող մոտեցումների վրա:

ՀՀ ԱԳ նախարար Զոհրաբ Մնացականյանի և Սուրբ Աթոռի պետությունների հետ հարաբերությունների քարտուղար, արքեպիոսկոպոս Պոլ Ռիչարդ Գալագերի հետ հանդիպմանը անդրադարձ է կատարվել միջազգային և տարածաշրջանային արդի հարցերին, փոխադարձաբար ներկայացվել են դրանց հասցեագրման ուղղությամբ երկու պետությունների դիրքորոշումները և մոտեցումները:

«Մեր քաղաքական օրակարգում է Մերձավոր Արևելքում կրոնական փոքրամասնությունների, քրիստոնյաների պաշտպանության հարցերը, քրիստոնեական պատմամշակութային ժառանգության պահպանումը»,- ասաց Մնացականյանը:

ՀՀ ԱԳ նախարարը ներկայացրել է նաև Լեռնային Ղարաբաղի հիմնախնդրի խաղաղ կարգավորման գործընթացի շուրջ վերջին զարգացումները և այդ առնչությամբ Հայաստանի սկզբունքային դիրքորոշումները և մոտեցումները:

Որպես միջազգային հարթակում ցեղասպանությունների և մարդկության դեմ հանցագործությունների կանխարգելման օրակարգի առաջամարտիկ՝ Հայաստանի և Սուրբ Աթոռի դիվանագետներն անդրադարձել են նաև այդ օրակարգի շրջանակներում ձեռնարկվող քայլերին և առկա մարտահրավերներին:

«Ընդգծեմ, որ պաշտոնական Երևանը և հայ ժողովուրդը երախտապարտ է Հռոմի սրբազան քահանայապետին՝ Հայոց ցեղասպանության ճանաչման սկզբունքային ու միանշանակ ուղերձի համար: Այդ հանցագործության աներկբա դատապարտումը կարևոր է ոչ միայն ճշմարտության  ու պատմական արդարության տեսակետից, այլև մեծ ներդրում է ապագա նմանօրինակ ոճրագործությունների կանխարգելման և ազգերի ու պետությունների միջև հարատև համերաշխությանը հասնելու համար»,- շեշտեց Մնացականյանը:

ԱԳ նախարարը գործընկերոջը նաև ներկայացրել է Հայաստանի ներկայիս ներքաղաքական օրակարգը և կառավարության աշխատանքը ուղղված երկրի բարեփոխումները:

Սուրբ Աթոռի պետությունների հետ հարաբերությունների քարտուղար, արքեպիսկոպոս Պոլ Ռիչարդ Գալագերն իր հերթին նշեց, որ  Հայաստանի և Սուրբ Աթոռի միջև երկկողմ հարաբերությունները ավելի երկար պատմություն ունեն, հատկապես այն պատճառով, որ Հայաստանը առաջին քրիստոնեական երկիրն է աշխարհում:

«Ուրախ եմ փոխանցել Նորին Սրբություն Պապ Ֆրանցիսկոսի ողջույնը Հայաստանի իշխանություններին, ինչպես նաև իր հավաստիքը և աղոթքը հայ ժողովրդի հետագա զարգացման, խաղաղության և ներդաշնակության համար: Այս այցը նպատակ ունի արտահայտել բարեկամությունը, որը բնորոշում է մեր երկկողմ հարաբերությունները: Երկկողմ հարաբերությունները Հայաստանի Հանրապետության և Սուրբ Աթոռի միջև հաստատվել են 1992 թվականի մայիսին, բայց շփումները մեր միջև ավելի երկար պատմություն ունեն, հատկապես այն պատճառով, որ Հայաստանը առաջին քրիստոնեական երկիրն է աշխարհում»,- ընդգծեց Գալագերը:

Արքեպիսկոպոսի կարծիքով` երկու երկրների հարաբերությունները շատ ավելի լայն են և ընդգրկուն:

«Այն ներառում է բարեգործության և սոցիալական աջակցություն, մշակութային ծրագրեր, հաճախակի տեղի ունեցող երկկողմ խորհրդակցություններ, որոնք վերաբերում են տարածաշրջանային հարցերին և ավելի լայն միջազգային հարաբերություններին»,- եզրափակեց Գալագերը:

 

 



Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am