ԵՐԵՎԱՆ, 24 ՀՈԿՏԵՄԲԵՐԻ, ԱՐՄԵՆՊՐԵՍ: Կառավարությունը բավարարեց «ԱԷՍ ԹՐԵՅԴ» ՍՊԸ-ի կողմից ներկայացված հայտը գերակա ոլորտում իրականացվող ներդրումային ծրագրի շրջանակներում ներմուծված (ներմուծվող) տեխնոլոգիական սարքավորումները, դրանց բաղկացուցիչ ու համալրող մասերը, հումքը և նյութերը ներմուծման մաքսատուրքից ազատելու արտոնությունից օգտվելու համար:

Էկոնոմիկայի նախարար Տիգրան Խաչատրյանը նշեց, որ 2013 թվականից ընկերությունը գործում է Երևանում, զբաղվում է լուսաթափանց կոնստրուկցիաներով դռների ու պատուհանների արտադրությամբ: «Այս ծրագրի շրջանակներում ընկերությունը նախատեսում է իրականացնել  7 մլրդ 686 մլն դրամի ներդրում: Ներկայումս ընկերությունում աշխատում է 64 աշխատակից: Այս ծրագրի իրականացման արդյունքում ընկերության աշխատակիցների թիվը կավելանա 30-40-ով՝  145 հազար դրամ միջին աշխատավարձով»,- «Արմենպրես»-ի փոխանցմամբ, ասաց նախարարը՝ հավելելով, որ այս ծրագրով արտադրվող արտադրանքը գնահատվում է 8,8 մլրդ դրամ, որի 70-80 տոկոսը կիրացվի ՀՀ-ում: