Ղափամայի փառատոնը Շիրակում կդառնա ամենամյա
ԳՅՈՒՄՐԻ, 19 ՀՈԿՏԵՄԲԵՐԻ, ԱՐՄԵՆՊՐԵՍ: Շիրակի մարզում հոկտեմբերի 19-ին առաջին անգամ անցկացվեց Ղափամայի փառատոն: Թեև փառատոնի անցկացման վայրը Առափի համայնքն էր, գաղափարը համախմբել էր նաև հարևան Ոսկեհասկ, Հայկավան, Ախուրիկ համայնքների բնակիչներին: Կազմակերպիչները վկայում են՝ փառատոնը հիմնականում կազմակերպվել է գյուղական կյանքը ակտիվացնելու, չորս միավորվող գյուղական համայնքների զարգացումն ու կենսամակարդակը բարելավելու համար: Փառատոնը նաև նպատակ ուներ ճանաչելի դարձնել հայկական ավանդական խոհանոցի գաղտնիքներն ու զբոսաշրջության միջոցով նպաստել համայնքի զարգացմանը: «Գյուղերում կյանքը ակտիվացնելու համար այս չորս համայնքների բնակիչները համախմբվեցին և ստեղծեցին «Համայնքի երիտասարդների ձայնը ակումբ» և որպես առաջին մեծ միջոցառում, որոշեցինք անցկացնել հայկական ավանդական Ղափամայի տոն»,- «Արմենպրես»-ի փոխանցմամբ՝ նշեց մանկավարժ, միջոցառման համակազմակերպիչ Սուսաննա Ստեփանյանը՝ տեղեկացնելով, որ փառատոնը լինելու է ամենամյա, միայն թե հաջորդ տարիներին այն կանցկացվի մեկ այլ համայնքում՝ համայնքները համաչափ զարգացնելու համար:
Հայկական ավանդական ուտեստների ու ղափամայի հյուրասիրություն, ազգային երգ ու պար, գյուղական էկո մթերքի վաճառք, գյուղական կյանքի և կենցաղի ինտերակտիվ ներկայացում, ազգային խաղեր՝ Առափի այցելած հյուրերի համար հնարավորություն էր ստեղծված տեղում՝ անմիջապես գյուղացուց գյուղմթերք գնել։ «Անշուշտ, սա նոր հարթակ է գյուղացու համար իր բերքն ու բարիքը վաճառելու համար: Նմանատիպ փառատոնի կարիքը վաղուց էր զգացվում, ինչի մասին վկայում է այսօրվա բազմամարդ փառատոնը»,-ավելացրեց Սուսաննա Ստեփանյանը:
Աշնանային ցուցահանդես-վաճառքը կօգնի գյուղացիներին իրացնելու իրենց արտադրած էկոլոգիապես մաքուր գյուղմթերքները, ստանալ եկամուտ, բացահայտել նոր շուկա և նոր շուկայական հնարավորություններ՝ «Արմենպրես»-ի հետ ունեցած զրույցի ժամանակ նշեցին գյուղացիները:
Արմենուհի Մխոյան