Հայաստանի և Բելգիայի խորհրդարանների պատգամավորները քննարկել են տնտեսական հարաբերության մասին հարցեր
ԵՐԵՎԱՆ, 14 ՀՈԿՏԵՄԲԵՐԻ: ՀՀ Ազգային ժողովի Հայաստան-Բելգիա բարեկամական խմբի անդամները Բելգիայի Թագավորության խորհրդարանական պատվիրակության անդամների հետ քննարկել են երկկողմ տնտեսական հարաբերություններին, միջազգային քաղաքականությանը՝ մասնավորապես Թուրքիայի՝ Սիրիա ներխուժմանն առնչվող հարցեր: «Արմենպրես»-ի հաղորդմամբ՝ պատգամավորները հանդիպել են Հայաստանում հոկտեմբերի 14-ին:
Բարեկամական խմբի ղեկավար Շիրակ Թորոսյանը կարեւորել է երկու երկրների օրենսդիր մարմինների միջեւ փոխգործակցության զարգացումը:
Բելգիայի Թագավորության խորհրդարանական պատվիրակության անդամները մասնակցել են «Համագործակցություն հանուն արդարության եւ խաղաղության» խորագրով Արցախի բարեկամների համաժողովին, որի նպատակն է ընդլայնել եւ ամրապնդել Արցախի Հանրապետության համագործակցությունն օտարերկրյա պետությունների հետ, նոր ազդակ եւ գործնական բնույթ հաղորդել Արցախի արդեն առկա միջազգային կապերին:
Շիրակ Թորոսյանը շնորհակալություն է հայտնել գործընկերներին Հայաստանի արտաքին քաղաքական երկու կարեւոր ուղղությունների ՝ Հայոց ցեղասպանության ճանաչման եւ դատապարտման, ինչպես նաեւ Լեռնային Ղարաբաղի հիմնահարցի հետ կապված առողջ եւ տրամաբանված մոտեցումների համար: Ընդգծելով նման այցերի կարեւորությունը՝ նա նշել է, որ ստացված տեղեկությունները հասանելի են դարձնում Արցախի ժողովրդի ձայնը Եվրոպայում:
Դիվանագիտական քաղաքական հարաբերությունների զարգացման համատեքստում կարեւորվել են Հայաստանում Բելգիայի դեսպանատան բացման եւ Բելգիա-Հայաստան խորհրդարանական բարեկամական խմբի ստեղծման հարցերը:
Քննարկվել են երկկողմ տնտեսական հարաբերություններին, միջազգային քաղաքականությանը՝ մասնավորապես Թուրքիայի՝ Սիրիա ներխուժմանն առնչվող հարցեր:
Նշվել է, որ Հայաստանը՝ որպես ԵԱՏՄ անդամ, կարող է հնարավորություն ընձեռել գործարարներին դուրս գալու ԵԱՏՄ շուկա, ինչը բավականաչափ հետաքրքրել է բելգիացի գործընկերներին: