Գիլոյանը Եվրասիական լիգայի մեկնարկը համարում է կայացած
ԵՐԵՎԱՆ, 7 ՀՈԿՏԵՄԲԵՐԻ, ԱՐՄԵՆՊՐԵՍ: Բասկետբոլի Եվրասիական լիգայի նախագահ Կարեն Գիլոյանը նորաստեղծ լիգայի մեկնարկը համարում է կայացած:
«Արմենպրես»-ի հետ զրույցում Գիլոյանը փաստեց, որ ծախսերը նվազագույնի հասցնելու նպատակով մեկնարկային երկու տուրերն ամբողջական չէին, քանի որ երկու թիմեր դեռևս չեն սկսել պայքարը:
«Ընտրված են հավասարազոր թիմեր, ինչն էլ նպաստում է մրցակցային լիգա ստեղծելուն: Ոչ մրցակցային լիգաները երկար կյանք չեն ունենում»,- ասաց լիգայի հիմնադիրը:
Եվրասիական լիգային մասնակցում են 6 թիմեր Հայաստանից, Ռուսաստանից, Ղազախստանից և Բելառուսից: 6-րդ թիմը Ռուսաստանից է , որը հայտնի կդառնա մոտ օրերս:
Հայաստանը ներկայացնող երկու թիմերից «Ուրարտու»-ն տոնել է մեկ հաղթանակ և կրել մեկ պարտություն: Նույն արդյունքն է գրանցել նաև «Արագած»-ը: