Վճռական քայլեր՝ դեպի իրավական պետություն. Վլադիմիր Կարապետյանը խոսել է Ջհանգիրյանի արդարացման մասին
ԵՐԵՎԱՆ, 19 ՍԵՊՏԵՄԲԵՐԻ, ԱՐՄԵՆՊՐԵՍ: Վարչապետի մամուլի քարտուղար Վլադիմիր Կարապետյանն անդրադարձավ Գլխավոր դատախազի նախկին տեղակալ Գագիկ Ջհանգիրյանի՝ մարտի 1-ի գործով Վճռաբեկ դատարանի արդարացմանը և ընդգծեց, որ կառավարությունը վճռական քայլեր է իրականացնում դեպի իրավական պետություն: Կառավարության նիստից հետո լրագրողների հետ զրույցում Կարապետյանը նշեց, որ կարևոր իրադարձություն է տեղի ունեցել: «Այդ արդարացումը պետք է շարունակաբար լինի: Մենք ունենք բազմաթիվ դեպքեր, երբ շատ անարդար են վարվել թե նախկին իշխանությունները, շատ մեղմ եմ ասում, թե «կից գործող» դատական համակարգը: Սա շատ լավ օրինակ կարող է հանդիսանալ այն մարդկանց համար, որոնք նախանձախնդիր են և պայքարելու են իրենց իրավունքները վերականգնելու համար: Դա նաև մեր պետության շահերից է բխում: Դուք շատ լավ հիշում եք, թե ինչպես է եղել այդ դեպքը. Գագիկ Ջհանգիրյանի և իր եղբոր մեքենան կանգնեցրեցին, ու 20 զինվորականներ գործողություն իրականացրեցին ձերբակալելով: Մեղադրանքը, որքան հիշում եմ, այն էր, որ Ջհանգիրյանը և այն ժամանակ իր հիվանդ եղբայրը դիմադրել են, ոստիկաններ են ծեծել: Այսինքն՝ ակնհայտ ապօրինություններ էին իրավապահների կողմից,ու ես շատ ուրախ եմ, որ պատմության այդ էջը քիչ-քիչ լուսաբանվում է և մի օր կփակվի արդար կերպով»,- «Արմենպրես»-ի փոխանցմամբ, ասաց Վլադիմիր Կարապետյանը:
Հարցին, թե վարչապետ Նիկոլ Փաշինյանը ևս կարող է դիմել դատարան ու պահանջել արդարացնել իրեն, մամուլի խոսնակն ասաց, որ վարչապետն այս հարցում կարծես հետ քաշված է ու սպասում է, որ այլ օրինակներ լինեն, որպեսզի որևէ ճնշում չդիտարկվի կամ որևէ առաջնորդություն չդիտարկվի այլ մարդկանց համար: «Ինքը վերջում կամ ինչ-որ փուլի կմիանա: Կարծում եմ՝ անպայման արդարացումները պետք է լինեն»,- ասաց Վլադիմիր Կարապետյանը:
2019 թվականի հուլիսի 16-ին Գագիկ Ջհանգիրյանը վճռաբեկ բողոք է ներկայացրել շուրջ 10 տարի առաջ կայացված դատական ակտի դեմ, որով ինքը մեղավոր էր ճանաչվել ոստիկանների նկատմամբ բռնություն գործադրելու համար՝ ՀՀ քրեական օրենսգրքի 316-րդ հոդվածի 1-ին մասով ու դատապարտվել 3 տարվա ազատազրկման: Ըստ դատավճռի՝ Ջհանգիրյանը 2008թ.-ին ՀՀ Ոստիկանության ԿՀԴՊ Գլխավոր վարչության վարչական շենք մտնելու պահին չենթարկվելով ոստիկանության աշխատակիցներին, ձեռքով հարվածել էր վարչության աշխատակցին՝ պատճառելով ֆիզիկական ցավ, նաև պատռել մեկ այլ աշխատակցի համազգեստը: Սեպտեմբերի 18-ին հայտնի դարձավ, որ Վճռաբեկ դատարանը բավարարել է ՀՀ գլխավոր դատախազի նախկին տեղակալ Գագիկ Ջհանգիրյանի բողոքը, որով նա պահանջել էր բեկանել տարիներ առաջ իր նկատմամբ կայացված մեղադրական դատավճիռը եւ արդարացնել։