Արժանի էինք այս հաղթանակին. Վարդան Մինասյան
ԵՐԵՎԱՆ, 15 ՕԳՈՍՏՈՍԻ, ԱՐՄԵՆՊՐԵՍ: Երևանի «Արարատ-Արմենիա» ֆուտբոլային ակումբի գլխավոր մարզիչ Վարդան Մինասյանի կարծիքով, իր թիմն արժանիորեն է դուրս եկել Եվրոպայի լիգայի որակավորման փլեյ-օֆֆ:
«Իհարկե, մենք արժանի էինք այս հաղթանակին: Մենք տակտիկապես ճիշտ գործեցինք և երկու խաղակեսում էլ պահպանեցինք տեմպը»,-«Արմենպրես»-ի հաղորդմամբ՝ լրագրողների հետ հանդիպման ժամանակ ասաց Մինասյանը:
Վերջինիս խոսքով՝ թիմը դեռևս ոչ մի տեղեկություն չունի հաջորդ մրցակցի՝ Լյուքսեմբուրգի չեմպիոնի մասին:
Ֆուտբոլի Եվրոպայի լիգայի որակավորման երրորդ փուլում Հայաստանի չեմպիոն «Արարատ-Արմենիա»-ն պատասխան խաղում հյուրընկալվելով վրացական «Սաբուրթալո»-ին՝ հաղթեց 2։0 հաշվով (առաջին խաղում պարտվել էր 1:2 հաշվով) և դուրս եկավ փլեյ-օֆֆ: