Պարտավոր էինք ավելի շատ գոլեր խփել. Վարդան Մինասյան
ԵՐԵՎԱՆ, 23 ՀՈՒԼԻՍԻ, ԱՐՄԵՆՊՐԵՍ: Երևանի «Արարատ-Արմենիա» ֆուտբոլային ակումբի գլխավոր մարզիչ Վարդան Մինասյանի կարծիքով, Եվրոպայի լիգայի որակավորման երկրորդ փուլի «Լինկոլն Ռեդ»-ի դեմ խաղում հարկավոր էր ավելի շատ գոլեր խփել:
«Կարող էինք և պարտավոր էինք ավելի խոշոր հաշվով հաղթել: Բայց չիրացրեցինք մեր ունեցած գոլային պահերը: Եվ ես դա կապում եմ ոչ թե վարպետության, այլ՝ ուշադրության պակասի հետ: Հակառակորդ թիմն ավելի շատ էր պաշտպանվում: Եվ մեզ համար դա սպասելի էր: Պաշտպանվելն ավելի հեշտ է, քան՝ հարձակվելը»,-«Արմենպրես»-ի հաղորդմամբ՝ լրագրողների հետ հանդիպման ժամանակ ասաց Մինասյանը:
Վերջինիս խոսքով՝ խաղի ելքի վրա իր ազդեցությունն ունեցավ տոթ եղանակը: «Երկրորդ կեսում մենք սկսեցինք կիսատ գործել՝ կիսատ փոխանցումներ, կիսատ պաշտպանություն: Դրա համար էլ գուցե արժանի չէինք երրորդ կամ չորրորդ գոլին»,-ասաց նա:
Ֆուտբոլի Եվրոպայի լիգայի որակավորման երկրորդ փուլում «Արարատ-Արմենիա»-ն հյուրընկալեց «Լինկոլն Ռեդ»-ին և հաղթեց երկու գնդակի առավելությամբ: