Վրացագետը քիչ հավանական է համարում Ռուսաստանի կողմից Լարսի անցակետի փակումը
ԵՐԵՎԱՆ, 24 ՀՈՒՆԻՍԻ, ԱՐՄԵՆՊՐԵՍ: Վրացագետը չի պատկերացնում, թե ինչ ներքաղաքական զարգացումներ պետք է տեղի ունենան Վրաստանում, որ ռուսական կողմը որոշի փակել Լարսի անցակետը: Ինչպես տեղեկացնում է «Արմենպրես»-ը, հունիսի 24-ին լրագրողների հետ զրույցում վրացագետը նշեց, որ դա Ռուսաստանի կողմից վերջին քայլը կլինի, որը կվերադարձնի «նախավրացականերազանքի» շրջան:
«Վրաստանի և Ռուսաստանի առևտրաշրջանառությունը կազմում է 1 միլիարդից ավելի և Ռուսաստանը 2 -3-րդ տեղում է: Ռուսաստանը պահպանում է առաջին հորիզոնականը տրանսֆերտների մասով` մոտ 250 միլիոն դոլար»,- ասաց Ջոնի Մելիքյանը:
Վրացագետը նշեց, որ Ռուսաստանը Վրաստանի զբոսաշրջության ոլորտում բավականին լուրջ ներդրում ունի և այն, որ ՌԴ նախագահ Վլադիմիր Պուտինի հրամանով կարող է արգելվել ռուսական ավիաընկերությունների կողմից դեպի Վրաստան ավիափոխադրումները, Վրաստանի տնտեսությանը զգացնել գտա:
«Այն փաստը, որ հուլիսի 8-ից է սկսելու ավիափոխադրումների արգելման գործընթացը, ցույց է տալիս, որ դա քաղաքական ուղերձ է Թբիլիսիին: Սակայն կարող է այս 3-4 օրվա ընթացքում իրավիճակը փոխվել: Մոսկվայում, կարծում եմ, ևս հասկանում են, որ մինչև հուլիսի 8-ը իրավիճակը կստաբիլիզացվի: Ավիափոխադրումների արգելումը զգացնել է տալու, որովհետև, եթե նայենք անցած տարվա տվյալները` 1.7 միլիոն այցելու էր գրանցվել Ռուսաստանի Դաշնությունից և մոտ 3 միլիարդ դոլար եկամուտ ռուս զբոսաշրջիկներն են ապահովել: Ինչքան շատ տևի այս սահմանափակումը, այնքան ավելի շատ գումար կկորցնեն Վրաստանի քաղաքացիները , ովքեր այդ ոլորտով են զբաղված, իսկ ռուս զբոսաշրջիկների թիվը բավական շատ է»-, ընդգծեց Մելիքյանը:
Վրաստանի խորհրդարանի պատգամավորները հունիսի 20-ին խափանել են Ուղղափառության միջխորհրդարանական վեհաժողովի աշխատանքները։ Ռուս պատգամավորների ներկայությունը միանշանակ չի ընդունվել Վրաստանի խորհրդարանականների կողմից, նրանք իրենց բողոքի ձայնն են բարձրացնել ռուս պատգամավորների մասնակցության առնչությամբ: Բողոքներն սկսվել են սկանդալից հետո՝ կապված Պետդումայի պատգամավոր Սերգեյ Գավրիլովի այցի հետ, որն զբաղեցնում է Ուղղափառության միջխորհրդարանական վեհաժողովի ղեկավարի պաշտոնը: Թբիլիսիի Ռուսթավելի պողոտայում նույն օրը բախումների հետևանքով 200-ից ավելի մարդ է տուժել, այդ թվում, ոստիկաններ, լրագրողներ: Ինչպես հայտնել են վրացական ԶԼՄ-ները, բերման է ենթարկվել մի քանի տասնյակ մարդ: Ցուցարարների և ոստիկանության աշխատակիցների միջև բախումներին հաջորդել է Վրաստանի խորհրդարանի նախագահ Իրաքլի Կոբախիձեի հրաժարականը: Նախագահ Սալոմե Զուրաբիշվիլին երկրում կազմակերպված ցույցերի համար մեղադրել էր Ռուսաստանին, ինչին ի պատասխան ՌԴ վարչապետ Դմիտրի Մեդվեդևը վրաց նախագահի հայտարարությունը ոչ պրոֆեսիոնալ է անվանել՝ նշելով, որ Ռուսաստանի վրա մեղք բարդելու փորձերը խեղաթյուրում են իրավիճակը: Հունիսի 21-ին Ռուսաստանի Դաշնության նախագահ Վլադիմիր Պուտինը հրամանագիր է ստորագրել, որը ռուսական ավիաընկերություններին արգելում է հուլիսի 8-ից սկսած ՌԴ քաղաքացիներին փոխադրել Վրաստանի տարածք: