ԵՐԵՎԱՆ, 13 ՀՈՒՆԻՍԻ, ԱՐՄԵՆՊՐԵՍ: Երևանում ընթացող գրոսմայստեր Կարեն Ասրյանի հուշամրցաշարի առաջատարները 17 շախմատիստներ են:

«Արմենպրես»-ի հաղորդմամբ` հուշամարցաշարում կայացել են երկրորդ տուրի պարտիաները: Հայաստանի ներկայացուցիչներից հաղթանակ տոնել են Զավեն Անդրիասյանը, Տիգրան Հարությունյանը, Լևոն Բաբուջյանը, Արմեն Միքայելյանը և այլոք:

Հայաստանի շախմատի ֆեդերացիան 2019 թ. հունիսի 10-20-ը Երևանում կազմակերպում է Օլիմպիական չեմպիոն Կարեն Ասրյանի հիշատակին նվիրված 10-րդ  միջազգային բաց մրցաշարը: 

Կարեն Ասրյանի անունը կրող միջազգային մրցաշարին այս տարի մասնակցում են 9 երկրների՝  Հայաստանի, Ամերիկայի Միացյալ Նահանգների, Գերմանիայի, Ռուսաստանի, Ուկրաինայի,  Իրանի, Արաբական Միացյալ Էմիրությունների, Էստոնիայի, Ղազախստանի 84 շախմատիստներ:

Այս տարի որակական առումով մրցաշարը չափազանց ուժեղ կազմ ունի: Մասնակիցների թվում են 12 գրոսմայստեր, ինչի շնորհիվ մրցաշարի պատանի մասնակիցները հնարավորություն են ստացել  լրացնելու գրոսմայստերի նորմա:

Կարեն Ասրյանը նորանկախ Հայաստանի ուժեղագույն շախմատիստներից մեկն էր: Նա ոսկյա տառերով է գրել իր անունը հայկական և համաշխարհային շախմատի պատմության մեջ: Շախմատային կարիերայի ընթացքում նվաճած տիտղոսների ոչ լրիվ ցանկը՝ Հայաստանի եռակի չեմպիոն, Հայաստանի ազգային հավաքականի կազմում Եվրոպայի և համաշխարհային Օլիմպիադայի չեմպիոն: