ԵՐԵՎԱՆ, 6 ՀՈՒՆԻՍԻ, ԱՐՄԵՆՊՐԵՍ: Արցախի Քաշաթաղի շրջանի Վակունիս համայնքի ղեկավար 1984թ. ծնված Էդուարդ Զաքարյանին ծեծի ենթարկելու և մարմնական վնասվածքներ պատճառելու դեպքի առթիվ 3 անձ ձերբակալվել է: Այս մասին «Արմենպրես»-ը տեղեկացավ Արցախի Հանրապետության ոստիկանության պաշտոնական կայքից: «Դեպքի առթիվ ԱՀ ոստիկանության քննչական վարչությունում հարուցվել է քրեական գործ ԱՀ քրեական օրենսգրքի 337-րդ հոդվածի 1-ին մասով` իշխանության ներկայացուցչի նկատմամբ բռնություն գործադրելը։  Քաշաթաղի շրջանի Բերձոր քաղաքի բնակիչ` 1976թ ծնված Կ.Ս-ն և ՀՀ Աբովյան քաղաքի բնակիչներ` 1980թ ծնված Ա.Ա-ն և 1975թ ծնված Ա.Ե-ն ձերբակալված են։ Նախաքննությունը շարունակվում է»,- նշված է հաղորդագրության մեջ: