Տիգրան Ավինյանը նախարարությունների թվի կրճատումը ընդհանուր քաղծառայության համակարգի ռեֆորմի նախնական փուլն է համարում
ԵՐԵՎԱՆ, 16 ՄԱՅԻՍԻ, ԱՐՄԵՆՊՐԵՍ: Նախարարությունների թվի կրճատումը ընդհանուր քաղծառայության համակարգի ռեֆորմի նախնական փուլն է: «Արմենպրես»-ի հաղորդմամբ՝ այս մասին կառավարության նիստից հետո լրագրողների հետ զրույցում ասաց փոխվարչապետ Տիգրան Ավինյանը:
Նրա խոսքով՝քաղծառայության ռեֆորմն իրենից ենթադրելու է մի քանի փուլ: «Առաջին հերթին մենք ընդհանուր ռազմավարություն ենք որդեգրելու քաղծառայության համակարգի զարգացման, օպտիմալացման ու արդյունավետության բարձրացման համար», - ասաց նա՝ դժվարանալով պատասխանել, թե քանի փոխնախարար կլինի ամեն մի նախարարությունում:
«Գործառույթներից ելնելով է որոշվելու, գնահատելու ենք, թե ինչ ֆունկցիաներ են նախկինում եղել փոխնախարարների վրա, արդյոք թերբեռնված կամ գերբեռնված են եղել այդ փոխնախարարները ու ըստ ֆունկցիաների ու գործառույթների, քանակները կհստակեցվեն», - նշեց Ավինյանը՝ հավաստիացնելով, որ դեռևս զանգվածային կրճատումներ չկան և դեռ չեն էլ պլանավորվում:
« Պետական ծառայության համակարգը արդյունավետ չի գործում: Այն վերանայումների կարիք ունի:Ես ենթադրում եմ, որ «Աշխատիր Հայաստան» ծրագրի շրջանակներում մենք որոշ միջոցառումներ նաև նախաձեռնելու ենք այն քաղծառայողների համար, որոնք դուրս են մնալու քաղծառայության համակարգից», - ասաց Տիգրան Ավինյանը: