Ոլորտային ներկայացուցիչները կարևորում են Հայաստանում մտավոր սեփականության պաշտպանությունը բոլոր բնագավառներում
ԵՐԵՎԱՆ, 26 ԱՊՐԻԼԻ, ԱՐՄԵՆՊՐԵՍ: Հայաստանում մտավոր սեփականության պաշտպանության համար դեռ որոշակի խոչընդոտներ կան, մասնավորապես դեռ լավ զարգացած չէ օրենսդրությունը: Ոլորտների ներկայացուցիչները կարևորում են հեղինակային, մտավոր սեփականության իրավունքների պաշտպանությունը տարբեր ոլորտներում:
«Արմենպրես»-ի հաղորդմամբ՝ նրանք նման տեսակետ հայտնեցին Մտավոր սեփականության միջազգային օրվան նվիրված «Մտավոր սեփականության ոլորտի կարևորությունը երկրի տնտեսությունում հեղափոխություն կատարելու գործում» թեմայով կոնֆերանսում։
«Վստահ եմ, որ հեղափոխությունից հետո ստեղծագործ հայ ազգի զավակներն այլևս չեն մտածում երկիրը լքելու և իրենց ստեղծագործ միտքն այլ ազգերի շահերին ծառայեցնելու մասին: Մնում է միայն վերացնել առկա խոչընդոտները, որ ստեղծագործ հայ համայնքը մեր երկիրը շենացնի: Այսօր տեսնում ենք, որ այդ քայլերն արդեն իրականացվում են: Մասնավորապես արդեն չեմ կարողանում մտաբերել, թե այս տարվա նախորդ մի քանի ամիսներին քաղաքական մեծամասնության ներկայացուցիչները քանի անգամ են հանդիպել և մտավոր սեփականության համայնքի ներկայացուցիչների հետ քննարկումներ ունեցել մտավոր սեփականության իրավունքին առնչվող հարցեր»,-ասաց «Մտավոր սեփականության իրավունքի կենտրոն»-ի հոգաբարձուների խորհրդի նախագահ Սարգիս Կնյազյանը:
ՀՀ տրանսպորտի, կապի և տեղեկատվական տեխնոլոգիաների նախարար Հակոբ Արշակյանը հատկապես նշեց մտավոր սեփականության կարևորությունը տեխնոլոգիական ոլորտում: «Լինելով ստեղծագործ մենք միշտ կարիք ենք ունենալու դա պաշտպանել և խոսել աշխարհի հետ համահունչ, նույն ստանդարտ լեզվով, և այդ լեզվով խոսելիս ունենալ մեր ստեղծագործությունները պահպանելու հստակ մեխանիզմներ: Ցավոք, Հայաստանի օրենսդրությունն այս պահին շատ զարգացած չէ այդ առումով»,-ասաց նա ու հավելեց՝ նշեց այդ ուղղությամբ ԱԺ պատգամավորների՝ նախարարության հետ համագործակցելու պատրաստակամության մասին:
ԱԺ «Իմ քայլը» խմբակցության պատգամավոր Սուրեն Գրիգորյանը խոսեց խնդրահարույց կետի մասին: Նա նկատեց՝ բոլորը գիտեն, որ ծրագրային ապահովման ոչ լիցենզիոն օգտագործումը համատարած բնույթ է կրում, սակայն դրանից անհարմարություն չեն զգում: Պատգամավորը նշեց՝ ինքը ևս նման բան արել է, սակայն ինչ-որ պահի դրա մասին մտածել է և հասկացել, որ խանութից ինչ-որ բան ուղղակի վերցնելն ու ծրագիր վերցնելը՝ դրա համար չվճարելով, նույն երևույթն են:
ՀՀ տնտեսական զարգացման և ներդրումների փոխնախարար Ավագ Ավանեսյանը նշեց, որ Հայաստանում գործող 900 սննդի օբյեկտներից միայն մոտ 41-ն է հեղինակային իրավունքի վճար վճարում: Վճարը կազմում է տարեկան միջինում 45-50 հազար դրամ: «Սա լրջագույն խնդրի մասին է խոսում: Սա նշանակում է, որ պետությունը, մասնավոր համայնքն ու ստեղծարար համայնքը պետք է միասին աշխատեն՝ կառուցելով այնպիսի մտավոր սեփականության պաշտպանության համակարգ, որ ապագայում կնպաստի ստեղծարար մտքի զարգացմանն ու պաշտպանությանը»,-եզրափակեց փոխնախարարը: