Երևանում կտեղադրվի Պերճ Զեյթունցյանի հիշատակը հավերժացնող հուշատախտակ
ԵՐԵՎԱՆ, 23 ԱՊՐԻԼԻ, ԱՐՄԵՆՊՐԵՍ: ՀԽՍՀ մշակույթի վաստակավոր գործիչ, արձակագիր, դրամատուրգ Պերճ Զեյթունցյանի հիշատակը հավերժացնող հուշատախտակը կտեղադրվի Կասյան փողոց թիվ 3 հասցեում։
«Արմենպրես»-ի հաղորդմամբ՝ այս որոշումը կայացվեց Երևանի ավագանու 2-րդ նստաշրջանի 3-րդ նիստի ժամանակ:
Միջնորդությունը ներկայացրել էին Պերճ Զեյթունցյանի ընտանիքի անդամները։
Երևանում կտեղադրվեն նաև ՀՍՍՀ գիտության և տեխնիկայի վաստակավոր գործիչ Համբարձում Սայադյանի, ակադեմիկոս Կարապետ Մելիք-Օհանջանյանի և բանասիրական գիտությունների դոկտոր, բանաստեղծ և թարգմանիչ Հրաչյա Թամրազյանի հիշատակը հավերժացնող հուշատախտակները:
Կարապետ Մելիք-Օհանջանյանի հիշատակը հավերժացնող հուշատախտակը կտեղադրվի Երևանի Կիևյան փողոցի թիվ 5 հասցեում, որի միջնորդությունը ներկայացվել է ՀՀ ԳԱԱ նախագահ Ռադիկ Մարտիրոսյանի կողմից:
Համբարձում Սայադյանի հիշատակը հավերժացնող հուշատախտակը նախատեսվում է տեղադրել Մոսկովյան փողոց թիվ 31 հասցեում, Հրաչյա Թամրազյանինը՝ Տերյան փողոց 59 հասցեում։