Ապրիլի 22-ին սպասվող իրադարձությունները
ԵՐԵՎԱՆ, 22 ԱՊՐԻԼԻ, ԱՐՄԵՆՊՐԵՍ: «Արմենպրես» պետական լրատվական գործակալությունը ներկայացնում է այսօր սպասվող իրադարձությունները:
Այսօր` ապրիլի 22-ին, խորհրդարանը կշարունակի աշխատանքը:
Վարչապետ Նիկոլ Փաշինյանը կայցելի ԵՊՀ, որտեղ կհանդիպի Տնտեսագիտության և կառավարման ֆակուլտետի պրոֆեսորադասախոսական կազմի և ուսանողների հետ:
Լրագրողների հետ կհանդիպի ՀՀ ԳԱԱ արևելագիտության ինստիտուտի տնօրեն, թուրքագետ Ռուբեն Սաֆրաստյանը: Նա իր դիտարկումները կներկայացնի Հայոց ցեղասպանության ճանաչման գործընթացի, Թուրքիայի ժխտողական քաղաքականության վերաբերյալ:
Միգրացիոն ծառայությունում «Մեդիա և միգրացիա» ծրագրի շրջանակում տեղի կունենա հերթական հանդիպումը՝ «Վերադարձ, հետընդունում (ռեադմիսիա) և վերաինտեգրում» թեմայով։ Քննարկումը կլինի ինտերակտիվ ու կուղեկցվի հարցուպատասխանով։
Երևանում պաշտոնապես կտրվի «Գյուղական տնտեսական զարգացում-նոր տնտեսական հնարավորություններ» (ԳՏԶ ՆՏՀ) ծրագրի պաշտոնական մեկնարկը: Միջոցառմանը բացման խոսքով հանդես կգան ՀՀ-ում ԱՄՆ արտակարգ և լիազոր դեսպան Լին Թրեյսին:
Հայաստանում ֆրանսիական համալսարանը կազմակերպում է հանդիպում 2003-2006թթ. Հայաստանում Ֆրանսիայի դեսպան ՆԳ Անրի Կյունիի և ներկայիս դեսպան ՆԳ Ժոնաթան Լաքոտի հետ: Ներկաները հնարավորություն կունենան ծանոթանալ երկու դեսպանների անցած մասնագիտական ճանապարհին:
Արամ Խաչատրյան համերգասրահում Հայաստանի պետական սիմֆոնիկ նվագախմբի հետ ելույթ կունենա աշխարհում մեծ ճանաչում վայելող դաշնակահար Ալեքսանդր Ռոմանովսկին։ Համերգը կղեկավարի նվագախմբի գեղ.ղեկավար և գլխավոր դիրիժոր Սերգեյ Սմբատյանը: Համերգային ծրագրում կհնչեն Սերգեյ Ռախմանինովի Դաշնամուրի կոնցերտը և Երկրորդ սիմֆոնիան։
Այս և այլ թեմաների մասին կարող եք մանրամասն ընթերցել armenpress.am կայքէջում: Հետևեք մեզ նաև թվիթերում և ֆեյսբուքում: