Հայ խոհարարների պատվիրակությունը մեդալներով է վերադարձել միջազգային մրցույթից
ԵՐԵՎԱՆ, 18 ԱՊՐԻԼԻ, ԱՐՄԵՆՊՐԵՍ: Հայ խոհարարների պատվիրակությունը օրերս վերադարձել է Դաղստանում անցկացված խոհարարական միջազգային մրցույթից՝ իր հետ բերելով 4 մեդալ՝ 1 ոսկի, 1 արծաթ և 2 բրոնզ:
«Արմենպրես»-ի հաղորդմամբ` ապրիլի 18-ին պատվիրակության ներկայացուցիչներն իրենց տպավորությունները կիսեցին լրագրողների հետ:
«Մեր կազմակերպության անդամներն այս տարի մասնակցել են տարբեր միջոցառումների, միջազգային մրցույթների և հաջողություններ ունեցել: Դաղստանի մրցույթի պատվիրակության անդամներն էին Յուրա Սարգսյանը, Էդիկ Սիմոնյանը, Արմեն Քեֆիլյանը, Գարիկ Ղազարյանը: Ես Մախաչկալայում որպես ժյուրիի անդամ էի»,-ասաց «Հայ խոհարարական ավանդույթների զարգացման և պահպանման» ՀԿ նախագահ Սեդրակ Մամուլյանը:
Նրա համոզմամբ` միջազգային մրցույթների շնորհիվ ոչ միայն ազգային ուտեստներն աշխարհում ճանաչելի դարձնելու հնարավորություն են ընձեռում, այլև կապեր են ստեղծում տարբեր երկրների խոհարարների, ասոցիացիաների, խոհարարական կազմակերպությունների, զբոսաշրջային տարբեր ընկերությունների հետ: «Տարբեր միջազգային հաստատությունների հետ համագործակցության արդյունքում կարողանում ենք տարածել մեր ազգային խոհանոցը»,-ընդգծեց Մամուլյանը:
Կազմակերպության խորհրդի անդամ Յուրի Սարգսյանի խոսքով` Դաղստանում անցկացված խոհարարական միջազգային մրցույթի «Ազգային ուտեստ» անվանակարգում ներկայացրել են Անի քաղցրավենիք աղանդը, դդումից աղցանը:
«Անցանք եզրափակիչ փուլ` վաստակելով երեք բրոնզե մեդալ. դա թիմային աշխատանք էր, իսկ անհատական մրցույթին մասնակցեցի ես, պատրաստեցի մեղրի, նուշի և բողկի համադրությամբ աղանդեր և արժանացա ոսկե մեդալի: Միջազգային ժյուրիի անդամների համար այդ աղանդերը համային բացահայտում էր»,-նշեց Սարգսյանը: Նա շեշտեց, որ մասնակցել են խոհարարներ 24 երկրից:
Ավելի վաղ հայ խոհարարները առաջին տեղն էին զբաղեցրել Եգիպտոսում կայացած միջազգային էքսպոյի «Լավագույն ազգային ուտեստ» անվանակարգում:
«Հայ խոհարարական ավանդույթների զարգացման և պահպանման» ՀԿ տնօրեն Արբի Կարխանին պատմեց, որ նախապես կազմակերպիչներին տեղեկացրել են, թե ինչ բաղադրիչներ են իրենց հարկավոր: «Ավելի քան տասը երկրից ժամանած խոհարարներ 800 հոգու համար նախատեսված ուտեստներ էին պատրաստում մեկ խոհանոցում: Մատուցել ենք Անի քաղցրավենիք, գաթա, մեզ հետ լավաշ էինք տարել: Մեր «Արցախի հականի» ուտեստը առաջին տեղը գրավեց այնտեղ: Հետաքրքիր էր, քանի որ մեզ նախապես չէին ասել, որ մրցույթ է լինելու: Պարզվեց` գաղտնի ժյուրի է եղել»,-ներկայացրեց Կարխանին:
Նա հավելեց, որ ամեն տարի այդ միջոցառմանը մասնակիցների քանակն ավելանում է, իսկ միջոցառումը նպաստում է Եգիպտոսում զբոսաշրջության զարգացմանը: