Արցախը դրական է գնահատում հումանիտար հարցերի քննարկումը, թեպետ դրանց իրականցման հարցում թերահավատ է
ՍՏԵՓԱՆԱԿԵՐՏ, 16 ԱՊՐԻԼԻ, ԱՐՄԵՆՊՐԵՍ: Պաշտոնական Ստեփանակերտը դրական է գնահատում Հայաստանի և Ադրբեջանի արտաքին գերատեսչությունների ղեկավարների կողմից հումանիտար ոլորտի հետ կապված հարցերի քննարկումը: Արցախի նախագահի մամուլի քարտուղար Դավիթ Բաբայանն «Արմենպրես»-ի հետ զրույցում նշեց, որ պաշտոնական Ստեփանակերտը վաղուց է հումանիտար առաջարկություններով հանդես եկել: Այլ հարց է, որ դրանք Ադրբեջանի կողմից անտեսվել են:
«Դրանք թույլ կտային ամրապնդել հրադադարի ռեժիմը և խախտումների թիվը նվազեցնել: Մասնավորապես, սահմանից դիպուկահարների հետ քաշումը, ազգային, միջազգային, կրոնական տոն օրերին հրադադարի ռեժիմի խախտման բացառումը: Ադրբեջանն այդ ամենին որևէ ձևով չի արձագանքել, ավելին սաստկացրել է խախտումները»,-ասաց Դավիթ Բաբայանը: Նա նշեց, որ իրենց կողմից առաջարկ է եղել բերքահավաքի ժամանակ հրադադարի ռեժիմը պահպանելու համար: Այնինչ, Ադրբեջանը բերքահավաքի ժամանակ հատուկ կրակում էր և այրում դաշտերը, չնայած, որ բազմիցս քամու հետևանքով այդ կրակը տեղափոխվում էր նաև Ադրբեջանի տարածք:
«Մենք բազմիցս դրա մասին բարձրաձայնել ենք ոչ միայն համանախագահներին, այլև այլ միջազգային կազմակերպություններին, որպեսզի հարցին ինչ-որ ձևով լուծում տրվի, սակայն ապարդյուն է եղել, որովհետև Բաքուն ոչ մի ընդառաջ քայլ չի արել: Հիմա եթե կա հնարավորություն իրականացնելու որևէ ծրագիր այս ուղղությամբ, ապա դրական է, բայց իմանալով Ադրբեջանին, մի քիչ թերահավատ ենք: Չնայած դա չի նշանակում, որ չպետք է փորձել»,-ասաց Դավիթ Բաբայան:
Անկախ ամեն ինչից՝ Դավիթ Բաբայանը վստահ է, որ խաղաղության և կայունության պահպանման միակ բանալին հայկական ուժեղ բանակ, համախմբված հասարակություն ունենալն է:
Մոսկվայում ապրիլի 15-ին Ռուսաստանի նախաձեռնությամբ կայացել է Հայաստանի, Ադրբեջանի և Ռուսաստանի ԱԳ նախարարներ Զոհրաբ Մնացականյանի, Էլմար Մամեդյարովի և Սերգեյ Լավրովի աշխատանքային հանդիպումը, որին նաև մասնակցել են ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա), Էնդրյու Շոֆերը (ԱՄՆ), ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպրչիկը: Հանդիպման արդյունքներով համատեղ հայտարարություն է ընդունվել, որում հայտնել են շահագրգռություն հակամարտության գոտում իրադրության հետագա կայունացման ուղղությամբ, մասնավորապես գյուղատնտեսական աշխատանքների ժամանակաշրջանում: Պայմանավորվել են փոխադարձության հիման վրա միջոցներ ձեռնարկել թույլատրելու կողմերի տարածքում կալանքի մեջ գտնվող անձանց հարազատների այցերը: Նախարարները պատրաստակամություն են հայտնել գործնական միջոցներ ձեռնարկել մարդկանց միջև շփումների հաստատման ուղղությամբ, այդ թվում ԶԼՄ-ների ներկայացուցիչների փոխադարձ այցելությունների միջոցով:
- ԲՏԱ նախարարության և «Ստարտափ Արմենիա» հիմնադրամի միջև փոխըմբռնման
հուշագիր է ստորագրվել
- ԵԱՏՄ-ից Հայաստանի դուրս գալու նախաձեռնություն չկա․ Արման Եղոյան
- Նշվել է Հայ-ռուսական համալսարանի օրը. այս տարի բուհ են ընդունվել
ռեկորդային թվով ուսանողներ
- Հայաստանն ու Հնդկաստանը փոխշահավետ ծրագրեր կարող են իրականացնել մի շարք
ոլորտներում, Արմեն Սարգսյանն ընդունել է Կիշան Դան Դևալին
- Ադրբեջանի իշխանությունները քաղաքականացնում են գերիների վերադարձը. ՀՀ
ՄԻՊ-ը՝ Կոլումբիայի համալսարանի քննարկմանը