1000х90.jpg (78 KB)

Սուրեն Պապիկյանը հավաստագրեր է հանձնել նախարարությունում պրակտիկա անցած երիտասարդ մասնագետներին

Armenpress 18:18, 15 Ապրիլ, 2019

ԵՐԵՎԱՆ, 15 ԱՊՐԻԼԻ, ԱՐՄԵՆՊՐԵՍ: ՀՀ տարածքային կառավարման և զարգացման նախարար Սուրեն Պապիկյանն ապրիլի 15-ին հրաժեշտի հանդիպում է անցկացրել նախարարությունում աշխատանքային փորձ ձեռք բերելու նպատակով եռամսյա պրակտիկան հաջողությամբ անցկացրած և ավարտած երիտասարդ մասնագետների հետ։

Ինչպես «Արմենպրես»-ին տեղեկացրին ՀՀ տարածքային կառավարման և զարգացման նախարարության հասարակայնության հետ կապերի բաժնից, նախարար Պապիկյանը շնորհակալություն է հայտնել պրակտիկայի ողջ ընթացքում երիտասարդների ցուցաբերած նախաձեռնողականության, անհատական ու թիմային աշխատանքում դրսևորած բարձր արդյունավետության համար և ուրախությամբ փաստել, որ տարբեր բուհերում նրանց ձեռք բերած տեսական գիտելիքներն իրենց գործնական արտահայտումն են ստացել նախարարության տարբեր ստորաբաժանումների աշխատանքում։

Իրենց հերթին երիտասարդները շնորհակալություն են հայտնել նախարարին ընձեռնված հնարավորության համար և ընդգծել, որ նախարարության գործունեությանն ու նրա գործառույթներին հենց ներսից ծանոթանալն ուսանելի և օգտակար միջոց է նորավարտ մասնագետների կառավարչական հմտությունների զարգացման տեսանկյունից։ Միևնույն ժամանակ, պրակտիկանտները նշել են, որ նախարարության կողմից ստեղծված են եղել անհրաժեշտ բոլոր պայմանները ստորաբաժանումների աշխատանքներում լիարժեք ինտեգրման և ինքնադրսևորման համար։

Հանդիպման ավարտին նախարարը հավաստագրեր է հանձնել երիտասարդներին և վերահաստատել, որ առաջիկայում լավագույն մասնագետների համար նախարարության համակարգում մրցութային հիմունքներով աշխատանքի անցնելու հնարավորություններ կընձեռնվեն։ 



Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am