Իտալական ժամանակակից ճարտարապետության միտումները ներկայացվեցին հայաստանյան ցուցահանդեսում
ԵՐԵՎԱՆ, 22 ՄԱՐՏԻ, ԱՐՄԵՆՊՐԵՍ: Իտալիայի դիզայնի համաշխարհային օրվա շրջանակում իտալացի երիտասարդ ճարտարապետների նախագծերը, որոնք նախորդ տարի տարբեր մրցանակների են արժանացել, ներկայացվեցին Հայաստանում:
«Արմենպրես»-ի հաղորդմամբ`50 աշխատանք ընդգրկող ցուցահանդեսը բացվեց մարտի 22-ին Ճարտարապետության և շինարարության Հայաստանի ազգային համալսարանում:
«Առաջին անգամը չէ, որ մեր համալսարանում հյուրընկալում ենք իտալացի գործընկերների և նշում ենք Իտալիայի դիզայնի համաշխարհային օրը: Մենք համագործակցում ենք իտալական արվեստի և ճարտարապետական մի շարք դպրոցների հետ, իրականացնում ենք կրթական, մշակութային բազմաթիվ ծրագրեր»,- նշեց համալսարանի ռեկտոր Գագիկ Գալստյանը:
ՀՀ-ում Իտալիայի արտակարգ և լիազոր դեսպան Վինչենցո դել Մոնակոն ասաց, որ Իտալիան և դիզայնը չափազանց մոտ են: «Ճարտարապետությունը մեր արյան մեջ է. դրա գեղեցկությունն ու կախարդանքը արտահայտվում են ակադեմիական և տեխնոլոգիական կրթության ոլորտում: Ըստ իս` դիզայնը գնում է դեպի ապագա` կառուցելով ավելի հիմնավոր հայեցակարգեր: Դիզայնը գեղեցկություն է, առօրյա է, բայց այն պետք է լինի վերարտադրելի»,-ընդգծեց դեսպանը:
ՀՀ կրթության և գիտության փոխնախարար Գրիշա Թամրազյանի խոսքով` ՀՀ-ում բարձրագույն կրթության ոլորտում իրականացվող բարեփոխումների համատեքստում այս ցուցահանդեսը կարևոր նախաձեռնություն է: «Նման ցուցահանդեսները լրացուցիչ հնարավորություն են ստեղծում ուսանողների համար հաղորդակից լինել ճարտարապետության և դիզայնի ոլորտում համաշխարհային զարգացումներին»,-ասաց փոխնախարարը:
«Մենք այս ցուցահանդեսն անցկացնում ենք ամեն տարի, և այն իրականացնում ենք աշխարհի տարբեր ծայրերում: Երիտասարդ իտալացի ճարտարապետների աշխատանքները ցուցադրում ենք արտերկրում դրանք միջազգային հարթակում ճանաչելի դարձնելու համար»,-շեշտեց ճարտարապետ Լիվիո Սակկին:
Ցուցահանդեսի շրջանակում նախատեսվում են վարպետության դասեր` «Ժամանակակից ճարտարապետ, խելացի քաղաքներ և դիզայն» թեմայով: Վարպետության դասը կանցկացնեն «Studio Orizzontale»-ի ճարտարապետ Ստեֆանո Ռագացցոն և «Map studio-magnani pelzel architetti associati»-ի ճարտարապետ Ֆրանչեսկո Մանյանին:
Ցուցահանդեսը կազմակերպվել էր ՀՀ-ում Իտալիայի դեսպան Վինչենցո դել Մոնակոյի նախաձեռնությամբ: