ՀՀ ԱԺ նախագահն այցելել է Հայրենիքի պաշտպանի վերականգնողական կենտրոն
ԵՐԵՎԱՆ, 17 ՄԱՐՏԻ, ԱՐՄԵՆՊՐԵՍ: ՀՀ Ազգային ժողովի նախագահ Արարատ Միրզոյանն այցելել է Հայրենիքի պաշտպանի վերականգնողական կենտրոն:
Խորհրդարանի ղեկավարը Երևանի Մխիթար Հերացու անվան պետական բժշկական համալսարանի Արմեն Մուրադյանի եւ տնօրինության ուղեկցությամբ ճանաչողական շրջայց է կատարել վերականգնողական կենտրոնում, որը հագեցած է գերժամանակակից մասնագիտական սարքավորումներով եւ տարածաշրջանում միակն է իր հնարավորություններով:
Ինչպես «Արմենպրես»-ին տեղեկացրին ՀՀ ԱԺ լրատվության և հանրության հետ կապերի վարչությունից, շրջայց կատարելով կենտրոնի «Արմաթ» ինժեներական լաբորատորիայում, պարաֆինային, կինեզոլոգիական, էլեկտրական թերապիաների սենյակներում, որտեղ ժամանակակից սարքավորումների օգնությամբ վերականգնողական բուժում են ստանում վիրավորում ստացած մեր զինվորներն ու զինվորականները` ԱԺ նախագահը ծանոթացել է կենտրոնի ընթացիկ գործունեությանը եւ հետագա ծրագրերին:
Արարատ Միրզոյանը, նշելով, որ չափազանց տպավորված է, ասել է. «Կենտրոնի սարքավորումներով հագեցվածությունը նույնիսկ ամենաբծախնդիր քննադատներին կարող է բավարարել»: Խորհրդարանի ղեկավարի խոսքով՝ նմանօրինակ հաստատությունը պատիվ կարող է բերել ցանկացած, հատկապես Հայաստանի նման յուրօրինակ անվտանգային համակարգ ունեցող երկրի համար: Աժ նախագահի գնահատմամբ` կենտրոնի ստեղծման ծրագրի իրականացումը պահանջված եւ հաջողված է:
Խորհրդարանի ղեկավարը թեյի սեղանի շուրջ զրուցել է կենտրոնում վերականգնողական բուժում ստացող զինվորների հետ եւ պատրաստակամություն հայտնել քննարկել այն օրենսդրական բացերը, որոնք մատնանշվել են շրջայցի ընթացքում: