Ծաղկաձորի «Գոլդեն փելես» հյուրանոցը պետությանը նվիրաբերելու գործընթացը դեռևս ընթացքի մեջ է
ԵՐԵՎԱՆ, 14 ՄԱՐՏԻ, ԱՐՄԵՆՊՐԵՍ: Ծաղկաձորի «Գոլդեն փելես» հյուրանոցը պետությանը նվիրաբերելու գործընթացը դեռևս ընթացքի մեջ է: Այդ մասին կառավարության նիստից հետո լրագրողների հետ զրույցում նշեց Պետական գույքի կառավարման կոմիտեի նախագահ Նարեկ Բաբայանը։
««Գոլդեն փելես» ՍՊԸ-ի կողմից ցանկություն է հայտնվել գույքը պետությանը նվիրատվություն կատարելու, նմանատիպ այլ ցանկություն հայտնող չի եղել: Իսկ եթե կան գործարքներ, որոնց ժամանակ ապօրինություններ են թույլ տրվել, դրանք բացահայտում ենք, ուղարկում իրավապահներին և քննություն է իրականացվում», - «Արմենպրես»-ի հաղորդմամբ, ասաց Բաբայանը:
Նա միաժամանակ տեղեկացրեց, որ հյուրանոցի՝ պետությանը փոխանցվելու գործընթացն առայժմ չի ավարտվել, բացի այդ՝ առկա է նվիրատվությունից որոշ ժամանակ անց գույքը հետ վերցնելու ռիսկը, և պետք է ամեն ինչ անել՝ այդ ռիսկը չեզոքացնելու համար։ ՀՀ վարչապետ Նիկոլ Փաշինյանը հայտարարել էր, որ ՀՀ մաքսային ծառայության նախկին պետ Արմեն Ավետիսյանի ընտանիքը դիմել էր Պետական գույքի կառավարման վարչություն և հայտնել, որ Ծաղկաձորի «Գոլդեն փելես» հյուրանոցը նվիրում է պետությանը: