Հայաստանի ու Վրաստանի նախագահներն անդրադարձել են սահմանային դելիմիտացիայի խնդրի լուծմանը
ԵՐԵՎԱՆ, 13 ՄԱՐՏԻ, ԱՐՄԵՆՊՐԵՍ: Հայաստանի Հանրապետության նախագահ Արմեն Սարգսյանն ու Վրաստանի Հանրապետության նախագահ Սալոմե Զուրաբիշվիլին անդրադարձել են երկու երկրների ընդհանուր սահմանի դելիմիտացիայի խնդրի լուծմանը: «Արմենպրես»-ի փոխանցմամբ՝ մարտի 13-ին այս մասին նախագահների համատեղ հայտարարության ընթացքում ասաց Վրաստանի նախագահ Սալոմե Զուրաբիշվիլին:
«Կարծում եմ՝ արդեն եկել է ժամանակը, որ մենք ավարտենք մեր սահմանային դելիմիտացիան: Չի կարելի, որ այդ խնդիրը լինի երկու երկրների միջև: Մենք որոշեցինք ընթացք տալ այն համաձայնությանը, որը ձեռք էր բերվել այն ժամանակ, երբ ես դեռ ԱԳ նախարար էի (2004-2005թթ.-խմբ.)»,- ասաց Զուրաբիշվիլին:
Վրաստանի Հանրապետության նախագահը Հայաստան է ժամանել պաշտոնական այցով: