ԱԺ հանձնաժողովը բացասական եզրակացություն տվեց Նաիրա Զոհրաբյանի նախնական կալանքի մեկ օրը մեկ ու կես հաշվելու մասին նախագծին
ԵՐԵՎԱՆ, 28 ՓԵՏՐՎԱՐԻ, ԱՐՄԵՆՊՐԵՍ: ՀՀ ազգային ժողովի պետաիրավական հարցերի մշտական հանձնաժողովը բացասական եզրակացություն տվեց «Բարգավաճ Հայաստան» խմբակցության պատգամավոր Նաիրա Զոհրաբյանի՝ նախնական կալանքի մեկ օրը որպես մեկ ու կես հաշվելու մասին նախագծին:
«Արմենպրես»-ի հաղորդմամբ՝ նախագիծը բացասական եզրակացություն ստացավ հանձնաժողովի փետրվարի 28-ի նիստում։
Զոհրաբյանի՝ ՀՀ Քրեական օրենսգրքում փոփոխություն կատարելու մասին նախագիծը ստացավ 5 կողմ, 9 դեմ, 1 ձեռնպահ ձայներ:
Զոհրաբյանը լրագրողների հետ զրույցում նշեց, որ նախագիծը նորից շրջանառության մեջ դնելն իմաստ չունի: «Կառավարության կոնցեպտուալ քաղաքականությունն այս նախագծի վերաբերյալ պարզ է: Ես ասում էի, որ կարող եմ գալ կոնսենսուսի, մասնավորապես, այն առումով, որ այն չտարածվի ապագայի վրա: Ցավոք, կառավարությունը տվել էր բացասական եզրակացություն»,-ասաց Զոհրաբյանը:
Կառավարությունն այս նախաձեռնությանը բացասական եզրակացություն էր տվել փետրվարի 15-ին: