Պատգամավորը ռուսական կողմում հայկական վարորդական իրավունքի կիրառման սահմանափակումը չեղյալ համարելու պատրաստակամություն է նկատել
ԵՐԵՎԱՆ, 19 ՓԵՏՐՎԱՐԻ, ԱՐՄԵՆՊՐԵՍ: ՀՀ ազգային ժողովի «Բարգավաճ Հայաստան» խմբակցության պատգամավոր Միքայել Մելքումյանը Ռուսաստանի Դաշնության Դաշնային ժողովի Պետական դումայի ԱՊՀ գործերով, եվրասիական ինտեգրման և հայրենակիցների կապերի կոմիտեի նախագահ Լեոնիդ Կալաշնիկովի գլխավորած պատվիրակության հետ հանդիպման ընթացքում ռուսական կողմից նկատել է հայկական վարորդական իրավունքը ՌԴ-ում ճանաչելու համար պատրաստակամություն:
«Արմենպրես»-ի հաղորդմամբ` Մելքումյանն այս մասին ասաց ԱԺ-ում հրավիրված ասուլիսում:
«Կալաշնիկովը հնչեցրեց այդ հարցը: Նախնական պայմանավորվածություն կա, որ չեղյալ համարեն այս սահմանափակումը ԵԱՏՄ երկրների շրջանակում: Պետք է պարզ քայլելով հասնենք վարորդական իրավունքի սահմանափակման վերացմանը»,- ասաց Մելքումյանը:
Պատգամավորը հիշեցրեց, որ պայմանագրով աշխատող ՀՀ քաղաքացիների վարորդական իրավունքը Ռուսաստանում չի ճանաչվում, իսկ հայ զբոսաշրջիկներինը ճանաչվում է: «Ուզում ենք հասնել նրան, որ չեղյալ համարեն այդ սահմանափակումը, հայկական վարորդական իրավունքը նորից ուժի մեջ լինի Ռուսաստանում: Օրենսդրական փոփոխությունը պետք է կատարվի ՌԴ-ում: Ռուսաստանում քաղաքական մակարդակով որոշում կա այս սահմանափակումը չեղյալ համարելու»,-նշեց պատգամավորը:
Նախորդ տարի ՌԴ-ում հունիսի 1-ից ուժի մեջ է մտել օրենքը, որի համաձայն Ռուսաստանում հայկական վարորդական իրավունքով աշխատող ՀՀ քաղաքացիներն այլևս չեն կարողանալու պայմանագրային հիմունքներով աշխատանք իրականացնել: Օրենքը պետք է ուժի մեջ մտներ դեռևս 2017 թ. հունիսի 1-ից, սակայն ՀՀ ԱԺ պատգամավորների ակտիվ աշխատանքի շնորհիվ հնարավոր էր եղել այն մեկ տարով հետաձգել: