«Լուսավոր Հայաստան» խմբակցության պատգամավորի կարծիքով, կառավարության ծրագրում դատական իշխանության խնդիրները մակերեսորեն են ներկայացված
ԵՐԵՎԱՆ, 14 ՓԵՏՐՎԱՐԻ, ԱՐՄԵՆՊՐԵՍ: ՀՀ ազգային ժողովի «Լուսավոր Հայաստան» խմբակցության պատգամավոր Տարոն Սիմոնյանը կառավարության ծրագրի նախագծում դատական իշխանությանը վերաբերող հատվածում որոշակիություն չի տեսնում: «Արմենպրես»-ի հաղորդմամբ` Սիմոնյանը նման տեսակետ հայտնեց Ազգային ժողովի ամբիոնից նախագծի քննարկման ժամանակ:
«Որոշակիությունը, հստակությունը այն կարևորագույն հիմքերն են, որ պետք է դնենք մեր աշխատանքի հիմքում: Սակայն իմ կարծիքով` կառավարութան ծրագիրը չի փայլում որոշակիությամբ: Դատական իշխանության բլոկում առկա խնդիրները մակերեսորեն են նշված: Եթե ուզում ենք դատական իշխանության անկախությունն ապահովել և հպարտանալ դրանով, պետք է գիտակցենք, որ առանց խորը անդունդի գեղեցկ մակերևույթ չի լինում: Առկա խնդիրները նեղացված են»,-ասաց Սիմոնյանը:
Նրա կարծիքով` պետք է խորանալ խնդիրների մեջ, միայն այդ դեպքում կարելի է խնդիրները լուծել: Պատգամավորը շեշտեց` դատական իշխանությունը պետականության ողնաշարն է: Եվ կարևորագույն խնդիրը դատական իշխանության, դատավորի իշխանության և անկախության ապահովումն է:« Ծրագրում խոսվում է, որ վեճերի լուծման այլընտրանքային տարբերակները պետք է զարգացնենք, բայց չի նշվում, թե ինչպես»,-նշեց պատգամավորը:
Ազգային ժողովը փետրվարի 14-ին շարունակում է կառավարության ծրագրի նախագծի քննարկումը:
Փետրվարի 12-ին կայացած նիստի ընթացքում ՀՀ վարչապետ Նիկոլ Փաշինյանը ներկայացրեց կառավարության փետրվարի 8-ին հաստատված ծրագիրը: Գործադիրի ղեկավարին հարց տալու համար հերթագրվել էր 53 պատգամավոր:
Փետրվարի 13-ին տեղի ունեցած նիստում ավարտվեցին վարչապետին ուղղված պատգամավորների հարցերը, և մեկնարկեց ելույթների շրջանը: Ելույթ ունենալու համար հերթագրվել է 43 պատգամավոր:
Կառավարության ծրագրի նախագիծը ներկայացվել էր կառավարության փետրվարի 6-ի նիստում, սակայն այն չէր հաստատվել, քանի որ ստացվել էին նոր առաջարկություններ:
Հայաստանի Հանրապետության Սահմանադրության 151-րդ հոդվածի 2-րդ մասի համաձայն՝ Ազգային ժողովը Կառավարության ծրագրին հավանություն է տալիս յոթնօրյա ժամկետում` պատգամավորների ընդհանուր թվի ձայների մեծամասնությամբ: