Նիկոլ Փաշինյանն անդրադարձել է Իրանի հետ տնտեսական և քաղաքական հարաբերությունների զարգացման հեռանկարներին
ԵՐԵՎԱՆ, 12 ՓԵՏՐՎԱՐԻ, ԱՐՄԵՆՊՐԵՍ: Հայաստանի Հանրապետությունը շարունակելու է Իրանի Իսլամական Հանրապետության հետ տնտեսական, էներգետիկ և քաղաքական ոլորտներում ակտիվ համագործակցությունը: «Արմենպրես»-ի փոխանցմամբ՝ այս մասին փետրվարի 12-ին Ազգային ժողովում ասաց ՀՀ վարչապետ Նիկոլ Փաշինյանը:
«Եվրասիական տնտեսական միությունն ու Իրանն ազատ առևտրի վերաբերյալ համաձայնագիր են ստորագրել, որը հիմա վավերացման ընթացակարգերում է, և վերլուծությունը ցույց է տալիս, որ այդ մեխանիզմի գործարկումն էական փոփոխություններ կմտցնի նաև հայ-իրանական տնտեսական հարաբերություններում: Մենք շատ ակտիվ համագործակցում ենք էներգետիկ ոլորտում և մտադիր ենք այդ համագործակցությունը խորացնել»,- ասաց Փաշինյանը:
Փետրվարի 27-ին պլանավորված Իրանի պաշտոնական այցով վարչապետը վերահաստատեց նաև հարևան պետության հետ քաղաքական հարաբերությունների բարձր մակարդակի առկայությունը:
«Մենք համոզված ենք, որ Իրանի հետ կպահպանենք բարձր մակարդակի փոխվստահության վրա հիմնված հարաբերություններ, և այդ հարաբերությունների նպատակը չի լինի որևէ երրորդ կողմին վնասելը, և այդ հարաբերություններում Հայաստանը չի լինի որևէ մեկին վնասելու գործի մասնակից»,- ասաց վարչապետը:
ՀՀ վարչապետ Նիկոլ Փաշինյանը Ազգային ժողովին է ներկայացնում փետրվարի 8-ին հաստատված Կառավարության ծրագիրը: