1000х90.jpg (78 KB)

Մակեդոնիայի ֆինանսների նախարարը հայաստանցի գործընկերներին պատմում է իրենց երկրում պրոգրեսիվ եկամտահարկին անցնելու պատճառների մասին

Armenpress 12:30, 12 Փետրվար, 2019

ԵՐԵՎԱՆ, 12 ՓԵՏՐՎԱՐԻ, ԱՐՄԵՆՊՐԵՍ:  Մակեդոնիայի Հանրապետությունը համահարթ եկամտահարկի համակարգից այս տարի կրկին անցում է կատարել պրոգրեսիվ հարկման համակարգին: Եվ այս երկրի ֆինանսների նախարար Դրագան Թևդովսկին եկամտահարկի համահարթեցման ճանապարհին կանգնած երկրում՝ Հայաստանում իր գործընկերներին պատմեց իրենց երկրում այդ համակարգի դրական ու բացասական կողմերի, դրան անցնելու պատճառների մասին:

«Արմենպրես»-ի հաղորդմամբ՝ Թևդովսկին Հայաստանում փետրվարի 12-ին «Հարկային համակարգ, արդարություն ու տնտեսության զարգացում» միջազգային համաժողովի շրջանակում լրագրողների հետ զրույցում ներկայացրեց իրենց երկրի փորձը:

«Մեր  երկրում 2007թ. համահարթ եկամտահարկն ընդունվեց։ Պետք է ասել, որ այդ ժամանակ Հարավարևմտյան Եվրոպայի շատ երկրներում ևս այն ընդունվեց: Դրանից հետո մեկ տասնամյակ անց մենք կրկին վերադարձանք պրոգրեսիվ հարկին»,- նշեց նախարարը։

«Արմենպրես»-ի հարցին ի պատասխան՝ Թևդովսկին ներկայացրեց փոփոխման պատճառների ու համահարթ եկամտահարկի բացասական կողմերի մասին: «Դա մեր երկրում առաջացրեց եկամտային ավելի մեծ անհավասարություն: Այդ համահարթ հարկն, ըստ էության, մեզ մոտ ներդրվել է համաշխարհային ճգնաժամի տարիներին: Եվ այդ համահարթ հարկի ներդրման հետևանքով մեր պետբյուջեի եկամուտները նվազել են: Եվ ետ ենք վերադառնում պրոգրեսիվ հարկին, ինչը կիրառվում է ԵՄ գրեթե բոլոր երկրներում»,-նշեց նա:

Նախարարն ասաց, որ դրա նպատակն է պետբյուջեի համար ձևավորել ավելի շատ մուտքեր, որը հնարավոր կլինի ուղղել այնպիսի կարևոր ոլորտների զարգացմանը, ինչպիսիք են կրթությունը, առողջապահությունը և սոցիալական ապահովությունը:

«Մեր փորձառության համաձայն՝ համահարթ եկամտահարկի կիրառման արդյունքում ընդհանուր հարկային ընթացակարգերը պարզեցվում են, սակայն քանի որ ավելի շատ եկամուտ վաստակողների նկատմամբ հարկման բազային դրույքաչափը նվազում է, հետևաբար այս հարկն առավել նպաստավոր է ավելի մեծ եկամուտներ ունեցողների համար»,- նշեց նախարարը:

Նա նշեց, սակայն, որ ինքն այս առումով չի կարող Հայաստանի կառավարությանը որևէ խորհուրդ տալ, քանի որ ինքն ուրիշ երկրից է գալիս, իսկ այստեղ ուրիշ տարածաշրջան ու ուրիշ իրականություն է:

Հայաստանում Հարկային օրենսգրքի փոփոխությունների նախագծով առաջարկվում է 2019թ. սեպտեմբերից անցում կատարել համահարթ եկամտահարկի՝ 23 տոկոս: Դրանից հետո՝ 2020-2023 թթ. այն աստիճանաբար նվազելու է՝ հասնելով 20 տոկոսի: Նախագիծը դեռ հանրային քննարկման փուլում է:

«Հարկային համակարգ, արդարություն ու տնտեսության զարգացում» միջազգային համաժողովը կազմակերպել են Ֆրիդրիխ Էբերտ հիմնարդամը և Քաղաքական դիսկուրս հանդեսը:



Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am