1000х90.jpg (78 KB)

Հայաստանում պետպատվերի շրջանակում առաջին անգամ արվելու է գերժամանակակից արագացուցիչներով ճառագայթային բուժում

Armenpress 15:01, 23 Հունվար, 2019

ԵՐԵՎԱՆ, 23 ՀՈՒՆՎԱՐԻ, ԱՐՄԵՆՊՐԵՍ: Հայաստանում առաջին անգամ պետպատվերի շրջանակում արվելու է գերժամանակակից արագացուցիչներով ճառագայթային բուժում: «Արմենպրես»-ի հաղորդմամբ՝ այս մասին լրագրողների հետ զրույցում ասաց ՀՀ առողջապահության նախարար Արսեն Թորոսյանը:

«Պետպատվերի շրջանակում ուռուցքաբանության համար ավելացվելու է գերժամանակակից արագացուցիչներով ճառագայթային բուժումը, որը մինչ այժմ չի եղել: Եղել է միայն գամմա կամերաներով ճառագայթային բուժում 200 քաղաքացիների համար»,-ասաց Թորոսյանը:

Նա նշեց, որ արագացուցիչներով ճառագայթային բուժման ամեն կուրսն արժի ավելի քան 1 մլն դրամ: «Ճառագայթային այս բուժումն առաջին անգամ Հայաստանում արվելու է պետպատվերի շրջանակում»,-շեշտեց նախարարը:

Նախարարը հայտնել էր նաև, որ այս տարի նախարարությունը 700 միլիոն դրամով ավելի է նախատեսել ուռուցքաբանական ծառայությունների համար: Դրա շնորհիվ մի շարք հիվանդանոցներում չարորակ հիվանդությունների վիրահատական բուժման գումարը պետությունը փոխանցելու է ամբողջությամբ:



Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am