Քննչական կոմիտեն զենքով ավազակային հարձակման համար մեղադրանք է առաջադրել 20-ամյա երիտասարդին


ԵՐԵՎԱՆ, 22 ՀՈՒՆՎԱՐԻ, ԱՐՄԵՆՊՐԵՍ: ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնում՝ Երևանում գործող սուպերմարկետում զենքի գործադրմամբ ավազակային հարձակման դեպքի առթիվ քննվող քրեական գործով իրականացված   քննչական գործողությունների արդյունքում պարզվել է ենթադրյալ հանցագործություն կատարած անձի ինքնությունը: Ձեռք բերված ապացույցների հիման վրա՝ վերջինիս մեղադրանք է առաջադրվել: Այս մասին «Արմենպրես»-ին տեղեկացրին ՀՀ քննչական կոմիտեի դեպարտամենտի տեղեկատվության և հասարակայնության հետ կապերի բաժնից։

Հաղորդագրության մեջ նաև նշված է. «Նախնական տվյալներով՝ 2019 թվականի հունվարի 17-ին` ժամը 02:40-ի սահմաններում, ենթադրյալ հանցագործություն կատարած անձը ուրիշի գույքի հափշտակություն կատարելու դիտավորությամբ մուտք է գործել Երևան քաղաքի Բաղրամյան փողոցում գործող սուպերմարկետ, որտեղ ի ցույց դնելով իր մոտ առկա ատրճանակը, ինչպես նաև սպառնալով պայթեցնել իր մոտ գտնվող պայթուցիկ սարքը,սուպերմարկետի աշխատակիցների կյանքի և առողջության համար վտանգավոր բռնություն գործադրելու սպառնալիքով՝ պահանջել է իրեն հանձնել դրամարկղում առկա ողջ գումարը, սակայն մի քանի րոպե անց դիմել է փախուստի՝ առանց որևէ բան հափշտակելու:

Դեպքի առթիվ 2019 թվականի հունվարի 17-ին Արաբկիր վարչական շրջանի քննչական բաժնում հարուցվել է քրեական գործ՝ ՀՀ քրեական օրենսգրքի 175-րդ հոդվածի 2-րդ մասի 4-րդ կետով:

Կատարվել է դեպքի վայրի զննություն, առգրավվել են նշված սուպերմարկետում գործող տեսախցիկների տեսագրառումները, հարցաքննվել վկաներ:

Քրեական գործով իրականացված քննչական և դատավարական այլ գործողությունների արդյունքում պարզվել են դեպքի մի շարք հանգամանքներ, ենթադրյալ հանցագործություն կատարած անձի ինքնությունը, ով Երևան քաղաքի բնակիչ է՝ ծնված 1999 թվականին: 2019թ. հունվարի 20-ին վերջինս ձերբակալվել է՝ զենքի գործադրմամբ ավազակային հարձակում կատարելու կասկածանքով:

Ձեռք բերված ապացույցների համակցությամբ՝ 20-ամյա երիտասարդին մեղադրանք է առաջադրվել՝ ՀՀ քրեական օրենսգրքի 175-րդ հոդվածի 2-րդ մասի 2-րդ և 4-րդ կետեորվ: Նրա նկատմամբ որպես խափանման միջոց է ընտրվել կալանավորումը:

Նախաքննությունը շարունակվում է:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով»:



Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am