Մեկնարկել է տիեզերական համագործակցության հարցերով 9-րդ խորհրդակցությունը
ԵՐԵՎԱՆ, 13 ԴԵԿՏԵՄԲԵՐԻ, ԱՐՄԵՆՊՐԵՍ: Երևանում դեկտեմբերի 13-ին մեկնարկել է ԱՊՀ մասնակից պետությունների գործադիր մարմինների ներկայացուցիչների տիեզերական համագործակցության հարցերով 9-րդ խորհրդակցությունը, որն անցկացվում է ՀՀ տրանսպորտի, կապի և տեղեկատվական տեխնոլոգիաների նախարարության հովանու ներքո: Ինչպես «Արմենպրես»-ին տեղեկացրին ՀՀ տրանսպորտի, կապի և տեղեկատվական տեխնոլոգիաների նախարարության լրատվական ծառայությունից, ողջունելով խորհրդակցության մասնակիցներին՝ նախարարի տեղակալ Արմեն Արզումանյանն անդրադարձել է Հայաստանի տիեզերական ծրագրի հեռանկարներին, Հայաստանի և Ռուսաստանի կառավարությունների միջև 2016թ. ապրիլի 7-ին ստորագրված համաձայնագրի շրջանակներում տիեզերական տարածությունը խաղաղ նպատակներով օգտագործելու հնարավորություններին։
Նա ընդգծել է այն կարևոր նշանակությունը, որ ունի նման միջոցառումների անցկացումը այս ոլորտում համագործակցությունն ընդլայնելու ճանապարհին։
Խորհրդակցության մասնակիցներին ողջունել է նաև «Ռոսկոսմոսի» գլխավոր տնօրենի տեղակալ Սերգեյ Սավելևը։ Նա խոսել է տնտեսության տարբեր ճյուղերում տիեզերական տեխնոլոգիաների ունեցած դերակատարության մասին, ինչն իր ազդեցությունն է թողնում տնտեսության զարգացման, բնակչության կենսամակարդակի բարձրացման վրա։