ԵՐԵՎԱՆ, 9 ԴԵԿՏԵՄԲԵՐԻ, ԱՐՄԵՆՊՐԵՍ: Կենտրոնական ընտրական հանձնաժողովի իրավիճակների վերլուծության կենտրոնը ԱԺ արտահերթ ընտրությունների քվեարկության օրը ստացել է ավելի քան 120 հեռախոսազանգ: «Արմենպրես»-ի փոխանցմամբ՝ այս մասին Կենտրոնական ընտրական հանձնաժողովում կայացած մամուլի ասուլիսում ասաց ԿԸՀ իրավաբանական վարչության պետ Լիլիա Հակոբյանը:

«Իրավիճակների վերլուծության կենտրոնն այս պահին շարունակում է պատասխանել հեռախոսազանգերին: Զանգերի թիվը նվազել է 21:00-ից հետո: Մի քանի զանգ ենք ստացել նաև ամփոփման աշխատանքների հետ կապված: Ընդհանուր առմամբ այս ընթացքում ԿԸՀ-ն ստացել է 120-ից ավելի հեռախոսազանգեր և տեղեկատվություն, որոնց վերաբերյալ պարզաբանումներ են տրվել: Դրանք եղել են տարաբնույթ: Ամենամեծ քանակը կազմել են ՀՀ տարածքից դուրս գտնվող ընտրողների քվեարկությանը մասնակցելու հնարավորություններին: Պարզաբանվել է, որ ԸՕ-ն նման հնարավորություն չի նախատեսում: Երկրորդ խումբը այն ահազանգերն են, որոնք ստացել են քաղաքացիներից, ովքեր հիվանդության պատճառով չեն կարողացել ինքնուրույն ներկայանալ տեղամասային կենտրոն: Պարզաբանում է տրվել, որ շրջիկ արկղի միջոցով իրենց չեն կարող քվեարկել»,- ասաց Լիլիա Հակոբյանը:

Լիլիա Հակոբյանը նշեց, որ արտառոց որևէ դեպք զանգերի միջոցով չի արձանագրվել: