Առողջապահության ֆինանսավորումը հաջորդ տարի էականորեն կաճի. Արսեն Թորոսյան
ԵՐԵՎԱՆ, 15 ՆՈՅԵՄԲԵՐԻ, ԱՐՄԵՆՊՐԵՍ: Առողջապահության ֆինանսավորումը հաջորդ տարի էականորեն կաճի: «Արմենպրես»-ի հաղորդմամբ՝ այս մասին «Ազատություն» ռադիոկայանի «Ֆեյսբուք»-ի ասուլիսի ժամանակ հայտնեց ՀՀ առողջապահության նախարարի պաշտոնակատար Արսեն Թորոսյանը:
Նրա խոսքով՝ պետական պատվերի շրջանակներում քաղցկեղի բուժման համար տրամադրվող միջոցները ևս կաճեն: «Մյուս տարվա համար քաղցկեղի բուժմանն ուղղվող գումարները 70 տոկոսով աճելու են»,- ասաց նա:
Նախարարի պաշտոնակատարն ընդգծեց, որ քաղցկեղի ախտորոշման համար Հայաստանում ընդամենը մի սարք է պակասում: «Մնացած սարքերի շարքը հասանելի է մեր երկրում: Կարծում եմ, որ առաջիկայում մեր հիվանդները քաղցկեղի ախտորոշման համար չեն գնա այլ երկրներ»,- նկատեց նա՝ հավելելով, որ պետության միջոցները սուղ են հիմա և չեն բավարարում բոլոր հիվանդների ախտորոշման համար: «Նույնիսկ քաղցկեղ ունեցող այն մարդկանց ուղղվող միջոցները, որոնց աջակցում ենք, համավճարների տեսքով են, դրանք վերջանալու դեպքում մարդիկ հերթագրվում են, իսկ քաղցկեղի դեպքում ուշացումը կարող է բերել ծանր հետևանքների»,- հավելեց Արսեն Թորոսյանը: