«Եվրոպա Դոննա Արմենիա» ՀԿ նախաձեռնությամբ եվրոպացի բժիշկները հյուրընկալվել են «Էրեբունի» ԲԿ մամոլոգիայի եւ կրծքագեղձի վիրաբուժության բաժանմունքում
ԵՐԵՎԱՆ, 14 ՆՈՅԵՄԲԵՐԻ, ԱՐՄԵՆՊՐԵՍ: Կրծքագեղձի ախտորոշումից մինչև ամենաբարդ վիրահատություններ այլևս հնարավոր է իրականացնել մեկ վայրում: «Էրեբունի» բժշկական կենտրոնում վերջերս բացված Մամմոլոգիայի եւ կրծքագեղձի վիրաբուժության բաժանմունքն ապահովված է նորագույն սարքավորումներով եւ պատրաստ՝ կրծքագեղձի քաղցկեղի դեմ պայքարել աշխարհի լավագույն կլինիկաներում կիրառվող բուժման մեթոդներով:
Ինչպեոս հաղորդում է «Արմենպրես»-ը, «Եվրոպա Դոննա Արմենիա» ՀԿ նախաձեռնությամբ Շվեցարիայի Լուգանոյի համալսարանի կրծքագեղձի դեպարտամենտի ղեկավար, պրոֆեսոր Օլիվիա Պագանին և Իտալիայի Ուռուցքաբանության եվրոպական դպրոցի գիտական գծով նախագահ, պրոֆեսոր Պեդրո Պեկատորին հյուրընկալվել են նորաբաց բաժանմունքում:
Եվրոպացի բժիշկները նաև բուժման տարբեր փուլերում գտնվող ու կրծքագեղձի խնդիր ունեցող հիվանդների են լսել` ծանոթացել վերջիններիս բուժման ընթացքին: Նրանք նաև կարծիքներ են փոխանակել իրենց հայ գործընկերների հետ` վերոնշյալ հիվանդների հետագա բուժումն առավել արդյունավետ կազմակերպելու նկատառումով:
«Մենք զբաղվում ենք կրծքագեղձի քաղցկեղի բուժման արդյունավետության բարձրացմամբ ամբողջ Եվրոպայում: Շատ լավ հնարավորություն էր գալ Հայաստան եւ հանդիպել հայ բժիշկների հետ: Նաև լավ հնարավորութուն է մեր հայ գործընկերների համար` փորձի փոխանակման ու գիտելիքների հարստացման առումով: Ուրախ ենք, որ կարող ենք աջակցել նրանց ու ինչպես նաև կրծքագեղձի խնդիրներ ունեցող մարդկանց», -Արմենպրեսի թղթակցի հետ զրույցում ասել է Շվեցարիայի Լուգանոյի համալսարանի կրծքագեղձի դեպարտամենտի ղեկավար, պրոֆեսոր Օլիվիա Պագանին:
Նրա խոսքով հայ գործընկերների հետ քննարկել են բարդ դեպքերն ու եկել այն եզրակացության, որ լավագույն բուժում է իրականացվել:
Նորաբաց բաժանմունքը և հայ գործընկերների մասնագիտական բարձր գիտելիքները տպավորել էր նաև պրոֆեսոր Պ. Պեկատորին: Նրա խոսքով Ուռուցքաբանության եվրոպական դպրոցը հիմնադրվել է 25 տարի առաջ` գլխավոր առաքելությունը համարելով տարբեր երկրների ուռուցքաբաններին աջակցելը: Եվրոպացի պրոֆեսորի խոսքով գործակցությունը շարունակական կլինի:
«Էրեբունի» ԲԿ Մամմոլոգիայի եւ կրծքագեղձի վիրաբուժության բաժանմունքի ղեկավար Ներսես Բերբերյանի համոզմամբ աշխարհի զարգացած երկրների կլինիկաներում իրականացվող հետազոտությունների արդյունքում անընդհատ փոխվում են բուժման արդյունավետությանը միտված մոտեցումները և այդ փորձը ուսանելու, կիրառելու խնդիր ունենք:
«Մենք փորձում ենք վերապատրաստմանը միտված տարբեր խորհրդաժողովներին մասնակցելով կիրառել նոր մոտեցումները: Հուսով եմ, որ մեր գործակցությունը կշարունակվի նաև հետագայում: Յուրաքանչյուր հիվանդի համար առանձին մոտեցում է պահանջվում, իսկ մեր նպատակն ու գերխնդիրը այդ բուժումը ամենաբարձր մակարդակով իրականացնելն է», - ասել է Ներսես Բերբերյանը:
Նրա խոսքով ճիշտ և արդյունավետ բուժմանը զուգահեռ Էրեբունի ԲԿ մամմոլոգիայի եւ կրծքագեղձի վիրաբուժության ծառայության համար վիրահատության ընթացքում գլխավոր խնդիրներից է կնոջ կյանքը փրկելուց բացի ուշադրություն դարձնել նաեւ էսթետիկ կողմին` կրծքագեղձի պահպանմանը` ինչը շատ կարեւոր է յուրաքանչյուր կնոջ համար: