Նաիրա Զոհրաբյանի կարծիքով՝ ռեյտինգային ցուցակները որոշակիորեն ապաքաղաքականացնելու են ընտրությունները
ԵՐԵՎԱՆ, 13 ՆՈՅԵՄԲԵՐԻ, ԱՐՄԵՆՊՐԵՍ: ԱԺ «Ծառուկյան» խմբակցության պատգամավոր Նաիրա Զոհրաբյանի կարծիքով՝ ռեյտինգային ցուցակները որոշակիորեն ապաքաղաքականացնելու են խորհրդարանական ընտրությունները: Նա գործընկերներին հորդորեց չփորձել նոր ընտրական համակարգում առաջնորդվել հին մեթոդներով՝ ընտրակաշառք բաժանելով: «Արմենպրես»-ի հաղորդմամբ՝ նա այս մասին նշեց ԱԺ-ում իր ելույթում:
«Ցավում եմ, որ մեկ ձայնի պակասով մեզ չհաջողվեց ընդունել այն Ընտրական օրենսգիրքը, որն ավելի արդար, բալանսավորված, ճշգրիտ, արդար ընտրական խաղի կանոններ կսահմաներ: Ռեյտինգային ցուցակներն, այնուհանդերձ, որոշակիորեն ապաքաղաքականացնելու են ընտրությունները: Որքան էլ վստահ լինենք, որ չի լինելու վարչական ռեսուրսի կիրառում, ընտրակաշառք, միևնույն է, անպայման աշխատելու են տեղի թաղային հարաբերությունները»,- ասաց Զոհրաբյանը:
Նա հիշեցրեց, որ ընտրակեղծարարության համար Քրեական օրենսգրքում նախատեսվել է խստագույն պատիժ: «Այն գործիչների աչքի առաջ, որոնք, օգտագործելով իրենց տեղային ազդեցությունը, կփորձեն այս կամ այն կերպ ազդել ընտրական գործըթնացի վրա, թող գա Քրեական օրենսգիրքը»,- նշեց պատգամավորը:
Նա հույս հայտնեց, որ նոր խաղի պայմանները բոլորի համար կլինեն ընդունելի և ընկալելի, և որևէ մեկը չի փորձի հին մեթոդներով նոր ընտրական համակարգում առաջնորդվել: Զոհրաբյանը շեշտեց, որ այս անգամ պատիժը չի շրջանցելու նման դեպքերը: