«Ռադիո Արաքս»-ի տնօրենը Ուրուգվայի հայկական համայնքի գլխավոր խնդիրը համարում է հայապահպանության հարցը
ԵՐԵՎԱՆ, 6 ՆՈՅԵՄԲԵՐԻ, ԱՐՄԵՆՊՐԵՍ: Ուրուգվայի «Ռադիո Արաքս»-ի տնօրեն Դիեգո Կարամանուկյանի կարծիքով` հասունացել է այն պահը, որ Հայաստանում ձևավորվի սփյուռքագիտություն մասնագիտությունը: Ինչպես տեղեկացնում է «Արմենպրես»-ը, լրագրողների հետ զրույցում Կարամանուկյանը նշեց, որ սփյուռքում ամեն համայնք իր յուրահատկությունը ունի. «Կարծում եմ՝ հասունացել է այն պահը, որ Հայաստանում ձևավորվի սփյուռքագիտություն մասնագիտությունը: Այսինքն` մասնագետներ լինեն, ովքեր կուսումնասիրեն ամեն գաղութի պատմությունը և համայնքի յուրահատկությունը ու տարբերությունը, այնուհետև անցնեն ծրագրերը իրականացնելուն: Չես կարող ծառայել մի ժողովրդի համար ՝ չիմանալով այդ համայնքի դժվարությունները, մտածելակերպը և մանրամասնությունները: Կարծում եմ՝ նոր իշխանությունը պետք նոր ծրագրեր իրականացնի՝ ուսումնասիրելով, թե ինչ է պետք այդ համայնքին»,- ասաց Կարամանուկյանը:
Ըստ նրա` Ուրուգվայի հայ համայնքի գլխավոր խնդիրը մնում է հայապահպանության հարցը:
«Ցավոք, դպրոցներում հայերենի ոսուցումը անբավարար է` հայկական դպրոցներում աշակերտների շրջանում ավելի շատ այլազգի կա, քան թե հայ: Իհարկե, մյուս կողմից ունենք պարախմբեր, երգչախմբեր և սկաուտական շարժում: Վերջերս նաև կազմակերպվել են համերգներ, սակայն, կարծում եմ, համայնքն ավելի շատ ապրում է պահերով և իրադարձություններով»,- նշեց Կարամանուկյանը: