«Ալաշկերտ»-ը մտադիր է մարզադպրոց բացել Մարտունի քաղաքում
ԵՐԵՎԱՆ, 6 ՆՈՅԵՄԲԵՐԻ, ԱՐՄԵՆՊՐԵՍ: Ֆուտբոլի Հայաստանի չեմպիոն «Ալաշկերտ»-ի ղեկավարությունը մտադիր է Մարտունիում ֆուտբոլային մարզադպրոց հիմնել:
«Արմենպրես»-ին այս մասին տեղեկացրին ակումբի մամուլի ծառայությունից: «Ցանկանում ենք հիմնել ֆուտբոլային մարզադպրոց, ունենալ մանկապատանեկան խմբեր Մարտունի քաղաքում: Այս թեմայով առանձնազրույց եմ ունեցել նաև Հայաստանի ֆուտբոլի ֆեդերացիայի նախագահ Արթուր Վանեցյանի հետ: ՀՖՖ-ն պատրաստ է աջակցել խաղադաշտի կառուցմանը»,-ասել է «Ալաշկերտ» ակումբի սեփականատեր Բագրատ Նավոյանը:
Վերջինս Մարտունու քաղաքապետին և Գեղարքունիքի նորընտիր մարզպետին կոչ է արել աջակցել «Ալաշկերտ» ֆուտբոլային ակումբին այս նախաձեռնությունում և համապատասխան հողատարածք հատկացնել` մարզադպրոց հիմնելու համար: Մարզադպրոցի սպասարկման ամբողջ ծախսը հոգալու է «Ալաշկերտ» ֆուտբոլային ակումբը: