ԵՐԵՎԱՆ, 22 ՀՈԿՏԵՄԲԵՐԻ, ԱՐՄԵՆՊՐԵՍ: Մեծ Բրիտանիան պատրաստ է ստեղծել ԵՄ օրենսդրական դաշտին միավորված մաքսային համակարգ: Ինչպես հաղորդում է «Արմենպրես»-ը՝ հղում կատարելով «ՌԻԱ Նովոստի»-ին, այս մասին հայտարարել է Մեծ Բրիտանիայի վարչապետ Թերեզա Մեյը:

«Ես չեմ ընդունում Իռլանդական ծովում սահմանի ստեղծումը: ԵՄ-ն ակտիվորեն քննարկում է մեզ հետ մաքսային կարգավորումների մասին առաջարկները…Փակուղու հաղթահարման համար մենք առաջարկում ենք ստեղծել ԵՄ-ի և Մեծ Բրիտանիայի համատեղ, օրենսդրության մակարդակում կապակցված մաքսային տարածք»,-ասել է Մեյը՝ ելույթ ունենալով խորհրդարանում:

Նրա խոսքով, Իռլանդիայի հետ սահմանների հարցը շարունակում է մնալ ամենաբարդերից մեկը, որի պատճառով կողմերը չեն կարողանում ավարտին հասցնել Brexit-ի պայմաններին վերաբերող ընդհանուր փաստաթղթի համաձայնեցումը:

Խոսելով Brexit-ից հետո անցումային շրջանի մասին, Մեյը նշել է, որ չէր ցանկանա նման բան, սակայն որոշ հանգամանքներից ելնելով, նման փուլ հնարավոր է:

Մեծ Բրիտանիան ԵՄ-ից դուրս կգա 2019 թվականի մարտի 29-ին: Նախատեսվում է, որ անցումային շրջանը կտևի 21 ամիս՝ մինչև 2021 թվականի սկիզբը: