Երևանը և ՀՀ հինգ մարզեր կընդունեն «Մշակութային դեսպան» պարի փառատոնը
ԵՐԵՎԱՆ, 19 ՀՈԿՏԵՄԲԵՐԻ, ԱՐՄԵՆՊՐԵՍ: «Մշակութային դեսպան» պարի ոչ մրցութային միջազգային փառատոնին կմասնակցեն մենապարողներ Սլովակիայից, Սերբիայից, Ռումինիայից, Հունաստանից, Վրաստանից և Աֆրիկայից։ Հայաստանը կներկայացնի «Սասնա ծռեր» ազգագրական պարային համույթը։ Փառատոնը կանցկացվի հոկտեմբերի 19-31-ը Հայաստանում:
«Արմենպրես»-ի հաղորդմամբ` խաղաղասիրական ուղղվածությամբ այս նախաձեռնության գերնպատակը տարբեր երկրների միջև միջմշակութային երկխոսությունն ամրապնդելն է, խաղաղասիրության գործում մշակութային դիվանագիտության դերը բարձրացնելը:
Փառատոնն անցկացվելու է Երևանում և ՀՀ հինգ մարզում, որտեղ հանդիպումներ և համատեղ վարպետության դասեր կկազմակերպվեն արտերկրից ժամանած արտիստների և ՀՀ մարզերի պարողների, մշակութային խմբերի և արվեստասեր բնակչության մասնակցությամբ։
Փառատոնի «Պարում ենք Նոյի երկրում» խորագրով գալա համերգը տեղի կունենան հոկտեմբերի 25-ին «Արամ Խաչատրյան» համերգասրահում:
Փառատոնն անցկացվում է «Ապագայի կամուրջներ» կրթամշակութային կենտրոն հասարակական կազմակերպության և ՀՀ մշակույթի նախարարության աջակցությամբ իրականացվող «Արվեստը հանուն խաղաղության» ծրագրի շրջանակում: