«Սոսե»-ն աշխարհի տարբեր ծայրերից Հայաստան է բերել տարբեր խնդիրներ բարձրաձայնող ֆիլմեր
ԵՐԵՎԱՆ, 17 ՀՈԿՏԵՄԲԵՐԻ, ԱՐՄԵՆՊՐԵՍ: «Սոսե» միջազգային կինոփառատոնի շրջանակում հոկտեմբերի 17-ին «Նարեկացի» արվեստի միությունում ցուցադրվեցին ռեժիսորներ Կերիմ Ռահբանիի «Բեռ», Միշայել Բարոկասի «Իմ երկու սեփական ձեռքերով», Շեվալիե Գիլյոմի «Խորաթափանցները» կինոնկարները:
«Մենք միշտ փորձում ենք ընտրել այնպիսի ֆիլմեր, որոնց արծարծած խնդիրները մշտապես արդիական են: Այսօր ցուցադրվող կարճամետրաժ կինոնկարներից մեկում խոսվում է պատերազմի ընթացքում և դրանից հետո երեխայի, հոր, պապի միջև առաջացած բարդ հարաբերությունների մասին: Պարզ է դառնում, թե ինչ հոգեբանական խնդիրներ կարող են առաջացնել պատերազմները»,- «Արմենպրես»-ի թղթակցի հետ զրույցում պատմեց «Սոսե»-ի համահիմնադիր և տնօրեն Սիմոն Սահակյանը:
Նրա խոսքով` ֆիլմերից մեկում ռեժիսորը ցույց է տալիս մարդու ձեռքերի կարևոր նշանակությունը մարդու ամբողջ կյանքի ընթացքում: «Այն չորս րոպե տևողությամբ համր ֆիլմ է, որում շատ ասելիք կա»,- ընդգծեց Սահակյանը:
«Խորաթափանցները» կինոնկարը պատմում է երկու երիտասարդ զույգի մասին, որոնք, չնայած կարճ ժամանակ են ճանաչում իրար, բայց կես բառից հասկանում են միմյանց:
Փառատոնի շրջանակում, Երևանից բացի, ցուցադրություններ են իրականացվել Եղեգնաձորում և Դիլիջանում: Անդրադառնալով դրանց` Սիմոն Սահակյանն ասաց, որ իրենք գոհ են «Սոսե»-ի ընթացքից և հատկապես՝ մարզերում տեղի ունեցած ցուցադրություններից, քանի որ կինոթատրոնները լեցուն էին, իսկ հանդիսատեսը` ոգևորված: «Դիլիջանի կինոթատրոնում մարդիկ դժվարությամբ էին հավատում, որ 30 տարի անց այն վերաբացվել է»,- շեշտեց նա և հավելեց, որ հոկտեմբերի 22-ին ցուցադրություն է նախատեսված նաև Գյումրիում:
«Սոսե» միջազգային կինոփառատոնի մրցութային փուլում կներկայացվի 172 ֆիլմ: Այս տարի փառատոնի շրջանակում ընդգրկվել են ժապավեններ ԱՄՆ-ից, Մեծ Բրիտանիայից, Իրանից, Ռուսաստանից, Իտալիայից, Իսպանիայից, Ֆրանսիայից և այլ երկրներից:
Կինոփառատոնն ունի հետևյալ անվանակարգերը` «Խաղարկային կարճամետրաժ», «Խաղարկային լիամետրաժ», «Վավերագրական», «Բովանդակությունը՝ կին» և «Ուսանողական»: Ներկայացվել է 742 ֆիլմի հայտ, դրանցից 172-ն է ընդգրկվել ծրագրում:
Երևանում ցուցադրություններ կիրականացվեն «Հայրենիք» կինոթատրոնում, «Նարեկացի» արվեստի միությունում, «The club»-ում:
«Սոսե» հինգերորդ միջազգային կինոփառատոնն անցկացվում է ՀՀ մշակույթի նախարարության աջակցությամբ։ Այն կտևի մինչև նոյեմբերի 23-ը: