1000х90.jpg (78 KB)

Էրդողանը ԵՄ-ին կոչ է արել Թուրքիայի անդամակցության հարցով հստակ որոշում կայացնել

Armenpress 20:35, 9 Հոկտեմբեր, 2018

ԵՐԵՎԱՆ, 9 ՀՈԿՏԵՄԲԵՐԻ, ԱՐՄԵՆՊՐԵՍ: Թուրքիայի նախագահ Ռեջեփ Թայիփ Էրդողանը Եվրամիությանը կոչ է արել հստակ որոշում կայացնել Թուրքիայի ԵՄ-ին անդամակցության հարցով: Այս մասին, ինչպես հաղորդում է «Արմենպրես»-ը, հայտնում է թուրքական «Միլլիեթ»-ը:

«Մեզ մի հոգնեցրեք, ոչ էլ ձեզ հոգնեցրեք: Պետք է պարզ լինել: Ես քաղաքականության մեջ պարզություն և հստակություն սիրող մարդ եմ»,- կոչ անելով հստակեցնել Թուրքիայի անդամակցության հարցը՝ ասել է Էրդողանը:

Թուրքիայի նախագահ Ռեջեփ Թայիփ Էրդողանը չէր բացառել ԵՄ անդամակցության շուրջ բանակցությունների շարունակականության հարցը հանրաքվեի դնելու հնարավորությունը:

Էրդողանի փոխանցմամբ՝ 1963թ-ից ի վեր ԵՄ-ն խաբում  է Թուրքիային և պահում անորոշության մեջ:

«Մենք շատ բան ունենք տալու ԵՄ-ին, սակայն 1963թ-ից ի վեր մեզ խաբում են: Միգուցե ԵՄ-ն ևս շատ բան ունի մեզ տալու, բայց եթե այսպես շարունակվի, մեզ կմնա հարցնել մեր 81 մլն ժողովրդին»,- ակնարկելով այդ հարցով հանրաքվեի անցկացման  հնարավորությունը՝ նշել էր Էրդողանը:

TRT World Forum գիտաժողովի ժամանակ ունեցած ելույթում էրդողանը նաև կարծիք էր հայտնել, որ Եվրամիությունը «մոտենում է իր պատմության ավարտին»:

Թուրքիայի Հանրապետությունը 1963թ-ին ԵՄ-ի հետ համաձայնագիր է ստորագրել, 1987թ-ին ԵՄ անդամ դառնալու հայտ ներկայացրել, 1999թ-ին դարձել ԵՄ անդամակցության թեկնածու, սակայն մինչ օրս ԵՄ անդամ չի դարձել:

 



Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am