Արդարադատության նախարարությունը շոշափելի արդյունքներ է գրանցել երեխաների նկատմամբ բռնության կանխարգելման ոլորտում
ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ: Արդարադատության նախարարությունը երեխաների նկատմամբ բռնության կանխարգելման ոլորտում իրականցվող քայլերում գրանցել է շոշափելի արդյունքներ: Ինչպես տեղեկացնում է «Արմենպրես»-ը, «Վե՛րջ երեխաների հանդեպ բռնությանը. դարձնե՛նք տեսանելի անտեսանելին» նշանաբանով համաժողովի բացման իր խոսքում այս մասին նշեց ՀՀ արդարադատության նախարար Արտակ Զեյնալյանը: Նա առանձնացրեց կատարված քայլերը. «Ընտանիքում բռնության կանխարգելման և համերաշխության վերականգման մասին» Հայաստանի Հանրապետության օրենքի ընդունումը, Ընտանեկան օրենսգրքի կատարելագործումը, քրեական և քրեական դատավարության օրենսգրքերի լրացումներ և փոփոխություններ կատարելու մասին օրենքների նախագծերը և մի շարք հարակից իրավական ակտեր:
«Այս օրենսդրական նախաձեռնությունները երկարաժամկետ ձեռնարկումների իրավական հիմք են , որի վրա զարգացնելու ենք կառուցակարգեր և աջակցության սխեմաներ: Անշուշտ` հասարակական կյանքում որակական, համակարգային փոփոխությունների հասնելու համար միայն օրենսդրությունը բավարար չէ: Ցավալիորեն, երեխաները բռնության զոհ են այդպիսի միջավայրերում , որտեղ միշտ չէ հնարավոր իրավական կարգավորումներով ապահովել լավագույն լուծումները: Լավագույն լուծումը սոցիալական նորմերի փոփոխությունն է` մեր համայնքներում երեխաների նկատմամբ հոգածության, պաշտպանության, մշակույթի զարգացման համալիր քայլերը, որին ձեռնամուխ ենք լինում մեր գործընկերների հետ »,- ընդգծեց Զեյնալյանը:
Արդարադատության նախարարը կարևորեց նաև բռնության արձագանքման` կանխարգելումից մինչև պաշտպանություն հզորացումը:
Զեյնալյանը նշեց, որ քրեական արդարադատության մարմինները ևս մասնագիտացման անհրաժեշտություն ունեն:
«Քրեական արդարադատության մարմինների համար արդեն իսկ մշակվել են ձեռնարկներ, շարունակաբար իրականցվում են վերապատրաստումներ, որպեսզի յուրաքանչյուր աշխատակից ապահովի երեխաների նկատմամբ անհրաժեշտ զգայուն մոտեցումը»,- ասաց Զեյնալյանը:
Ըստ նախարարի `ՀՀ կառավարության համար օրակարգային են երեխաների նկատմամբ բռնության կանխարգելումը , առաջնային աջակցության տրամադրումը, արդարադատության ծառայությունների հասանելիության ապահովումը:
«Այս խնդիրների լուծումը պահանջում է համագործակցության նոր մոտեցումներ` առկա հիմնախնդիրների արդյունավետ, որակական նոր մակարդակում կանխարգելող, արձագանքող լուծումներ: Արդարադատության նախարարությունը այդ ուղղությամբ ձեռնամուխ է եղել համակարգային երկարաժամկետ ծրագրերի իրականացմանը, ինչի հիմքում յուրաքանչյուր երեխայի լավագույն շահի ապահովման, կառուցակարգերի զարգացումն է: Միջազգային առաջավոր պրակտիկան որպես հիմնարար քայլ է դիտարկում միջգերատեսչական համագործակցային մարմնի ստեղծումը՝ որպես բռնության արձագանքման միասնական հարթակ»,- նշեց Զեյնալյանը:
Նախարարը հիշեցրեց, որ բազմաթիվ գործընկերների մասնակցությամբ և ՄԱԿ-ի Մանկական հիմնադրամի աջակցությամբ 2015 թվականին ստեղծվել է անչափահասների արդարադատության խորհուրդը՝ որպես բռնության արձագանքման միասնական հարթակ:
«Անչափահասների արդարադատության խորհուրդը, որպես համագործակցային հարթակ, ծառայում է երեխաների նկատմամբ բռնության կանխարգելման ոլորտի աշխատաքները համակարգելու գործին: Մասնավորապես` խորհրդի շրջանակներում վեր են հանվում այս ոլորտում առկա խնդիրները, անց է կացվում քարտեզագրում` արձանագրելու համար՝ որտեղ են մենք, ինչ խնդիրներ ունենք: Իրականացվում են օրենսդրության մշակման և երեխաների պաշտպանության գործուն համակարգի ներդրման աշխատաքները»,- եզրափակեց Զեյնալյանը: