Վանեցյանը` ՀՖՖ նախկին ղեկավարների, ազգային առաջնությունում լեգեոնականների սահմանափակման մասին
ԵՐԵՎԱՆ, 22 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի ֆուտբոլի ֆեդերացիայի նորընտիր նախագահ Արթուր Վանեցյանը լրագրողների հետ հանդիպման ժամանակ խոսեց Ֆեդերացիայի նախկին ղեկավարների, ազգային առաջնությունում լեգեոնականների սահմանափակման և այլնի մասին:
«Ես չէ, որ պետք է գնահատական տամ Ֆեդերացիայի նախկին ղեկավարների աշխատանքին: Պետք է պահպանենք դրականը և առաջ շարժվենք»,-«Արմենպրես»-ի հաղորդմամբ` ասաց ՀՖՖ նախագահը:
Վանեցյանը փաստեց, որ ինքը հանդիպել է Յուրի Ջորկաեֆի հետ, սակայն այլ մանրամասներ չի հայտնի: «Ֆուտբոլի ֆեդերացիայում «կադրերի ջարդ», բառի դասական իմաստով, չի լինելու: Յուրաքանչյուր աշխատակից ըստ իր պրոֆեսիոնալիզմի է գնահատվելու: Եթե մարդիկ կարող են աշխատել, ապա մնալու են իրենց պաշտոններում»,-ասաց Վանեցյանը:
Վերջինիս խոսքով՝ ազգային առաջնությունում առաջին հերթին պետք է ստեղծվի այնպիսի մթնոլորտ, որ պայմանավորված խաղերը բացառվեն: «Իսկ ինչ կապված է լեգեոնականների սահմանափակման հարցին, ապա պետք է լինեն լեգեոնականներ, բայց քանակը ինչ-որ կերպ պետք է սահմանափակվի»,-շեշտեց նա: